منگلورو کے 200سے زائد عیسائی زائرین کیرالہ کے مذہبی مرکز میں پھنسے ہوئے ہیں
منگلورو18؍اگست (ایس او نیوز) مسلسل بارش اور سیلاب کی وجہ سے تقریبا پوری ریاست کیرالہ کے انتہائی بدترین حالات کا شکار ہوگئی ہے۔ اس دوران منگلورو سے ملنے والی ایک رپورٹ کے مطابق منگلورو اور اس کے اطراف سے کیرالہ کے ’پوٹا ڈیوائن ری ٹریٹ سنٹر‘میں روحانی تزکیہ کے لئے جانے والے 200سے زیادہ عیسائی زائرین سیلابی کیفیت کی وجہ سے سنٹر میں پھنس کر ر ہ گئے ہیں اور پچھلے دو دنوں سے گھر والوں کے ساتھ ان کا کوئی رابطہ نہیں ہورہا ہے۔
بعض ذرائع سے ملنے والی خبروں کے مطابق کیرالہ کے اس روحانی سنٹر میں پھنسے ہوئے موڈیپو گاؤں سے تعلق رکھنے والے 8افراد سے جمعرات کے دن تک گھر والوں کا رابطہ قائم تھا۔ اس کے بعد سے ان کی کوئی خبر نہیں مل رہی ہے۔اس دوران سابق رکن اسمبلی جے آر لوبو نے بتایا کہ کارکلا، موڈبیدری، منگلورو اور میسورو وغیرہ سے بھی بہت سارے لوگ اس روحانی مرکز پر گئے ہوئے تھے جو بارش اور سیلاب کی وجہ سے وہاں پھنس کر رہ گئے ہیں۔بتایاجا تا ہے کہ ضلع انچارج وزیر یوٹی قادر اور ایم ایل سی ایوان ڈیسوزا نے کیرالہ میں پھنسے ہوئے افراد کے اہل خانہ سے بات کی اور انہیں دلاسہ دیا کہ حالات سدھرتے ہی زائرین کو بخیریت واپس لانے کا انتظام کیا جائے گا۔
معلوم ہوا ہے کہ راحت اور بچاؤ مہم میں جٹی ہوئی ریسکیو ٹیم پوٹا کے اس ڈیوائن ری ٹریٹ سنٹر میں پہنچ نہیں پارہی ہے کیونکہ اس علاقے میں بہنے والی چالاکوڈی ندی میں سیلاب آیا ہواہے۔ڈیوائن سنٹر کے کنڑا، انگلش اورکونکنی شعبے پوری طرح پانی میں ڈوب گئے ہیں۔ اس لئے تمام زائرین کو فی الحال ملیالم سنٹر میں منتقل کیا گیا ہے۔ پھنسے ہوئے زائرین کوصرف فوجی ہیلی کاپٹرس کی مددسے ہی وہاں سے نکالا جاسکتا ہے۔تازہ ترین رپورٹ کے مطابق جمعہ کی شب میں اس مرکز میں پھنسے ہوئے زائرین کو کھانا پہنچایا گیا ہے۔پورے علاقے میں بجلی کی فراہمی منقطع ہوگئی ہے۔پوٹا ری ٹریٹ سنٹر کے بارے میں بتایا جاتا ہے کہ یہ عیسائیوں کے روحانی تزکیہ کا دنیا میں سب سے بڑا مرکز ہے۔
