راولپنڈی،23؍جولای (ایس او نیوز؍ایجنسی) سابق وزیراعظم نواز شریف کے اڈیالہ جیل میں گردے فیل ہونے کا خدشہ ہے۔

سابق وزیراعظم نوازشریف کے خون میں یوریا کی مقدار خطرناک حد تک پہنچ گئی ہے جس کے باعث ان کی کڈنی فیل ہونے کا خدشہ ہے۔ نوازشریف کے جسم میں پانی کی شدید کمی اور دل کی دھڑکن بھی ناہموار ہے۔

میڈیکل بورڈ نے ہیلتھ سیکریٹری پنجاب کو ایمرجنسی سے مطلع کردیا ہے جبکہ ڈاکٹرز نے نوازشریف کوفوری اسپتال منتقل کرنے کا مشورہ دیا ہے۔

ذرائع کا کہنا ہے کہ ڈاکٹر اظہر کیانی اور ڈاکٹر حامد شریف خان نے نواز شریف کا معائنہ کیا۔ دونوں ڈاکٹرز نے نواز شریف کو راولپنڈی کارڈیالوجی منتقل کرنے کی سفارش کی۔ حکومت پنجاب کو اسپتال منتقل کرنے کی درخواست موصول ہو چکی ہے، وزارتِ داخلہ اس بارے میں فیصلہ کرے گی۔

واضح رہے کہ ایون فیلڈ ریفرنس میں نوازشریف کو 10 سال، مریم نواز کو 7 اور ان کے شوہر کیپٹن ریٹائرڈ صفدر کو ایک سال قید کی سزا سنائی گئی ہے۔