بھٹکل میں نونہال سینٹرل اسکول کے نونہالوں کا خوبصورت فینسی ڈریس مقابلہ
بھٹکل 11/فروری (ایس او نیوز) تعلقہ بھر میں معروف نونہال سینٹرل اسکول میں اتوار کو فینسی ڈریس مقابلہ منعقد ہوا جس میں ایل کے جی، یو کے جی، پہلی کلاس اور دوسری کلاس کے نونہالوں نے اپنی صلاحیتوں کے جوہر دکھلاتے ہوئے حاضرین سے داد و تحسین وصول کیا۔
کوئی وکیل اور انجینئر بنا تھا تو کوئی پائلٹ، رپورٹر، خلائی انسان، آرمی، پولس، اسپائیڈر مین، نانی اماں، مچھلی بائی۔ یہاں تک کہ بچوں نے چمگاڈر، ناریل کا درخت، مسواک، ڈیٹول، واشنگ مشین، ٹوتھ پیسٹ، شہد کی مکھی وغیرہ کا کردار ادا کرتے ہوئے بہترین مظاہرہ پیش کیا۔
چوتھی کلاس کی طالبہ انعم سنہری کی تلاوت کلام پاک سے پروگرام کا آغاز ہوا، اسکول کی ایک ٹیچر نے استقبال کیا، طالبات کے ایک گروپ نے حمد اور دوسرے گروپ نے نعت پاک پیش کیں۔ درمیان میں بچوں کے سرپرستوں کے لئے بھی گیمز ،کوئیز اور ریفل ڈراء پیش کئے گئے تھے، جو بے حد دلچسپ رہے۔
آخر میں جن بچوں کو اول،دوم اور سوم انعامات سے نوازا گیا، اُن کی تفصیل اسطرح ہے: ایل کے جی میں نبا عزیزالرحمن رکن الدین کو چمگاڈر کا رول ادا کرنے پر پہلا مقام حاصل ہوا، وکیل کے کردار پر عائزہ نوریٰ علی باپو کو دوم اورفاطمہ شہزا شاہ بندری کو سوم مقام سے نوازا گیا۔ یوکے جی میں ڈیٹول کا کردار نبھانے والی منہیٰ زبیدہ کو اول، حمدہ کو دوم اور رفع خان کو سوم مقام حاصل ہوا۔ پہلی کلاس کے بچوں میں اسٹوڈینٹ اور ٹیچر کا رول ادا کرنے والے رفعان کو اول مقام، نانی اماں کا رول ادا کرنے والی سودا رکن الدین کو دوم اور ساحل آن لائن نیوز رپورٹر کا کردار ادا کرنے والی فاطمہ فضاء جیلانی گنگولی کو سوم مقام حاصل ہوا۔دوسری درجے میں طوطا کا کردار نبھانے والی مریم قاسمجی کو اول مقام، مچھلی بائی کا کردار نبھانے والی شہر بانو کولا کو دوم مقام اور ناریل کا درخت بننے والے زید محتشم کو تیسرا مقام حاصل ہوا۔
خلائی انسان بننے والی علینیٰ نگار ، میزان بننے والی علینیٰ سنہری، گلاب بننے والی عائشہ کولا اور پلاسٹک بیگ کے استعمال سے روکنے والی سارہ محتشم کو خصوصی انعامات سے نوازاگیا۔
خیال رہے کہ سن 2004 سے یہاں ایس ایس ایل سی شروع ہوا تھا، اور ابتداء سے لے کر اب تک اس اسکول کا تعلیمی معیارتعلقہ بھر میں کافی بہترین رہا ہے، میٹرک میں اس اسکول نے کئی سالوں سے لگاتار سو فیصد نتائج درج کئے ہیں۔