بنگلورو۔17/جنوری(ایس او نیوز) ملک کی 58 فیصد دولت پر محض ایک فیصد طبقہ قابض ہے۔ اس سے ملک میں معاشی مساوات کے قیام کا تصور کبھی مکمل نہیں ہوسکے گا۔ یہ بات آج منی پور کے وزیراعلیٰ مانک سرکار نے کہی۔ پریس کلب کے احاطہ میں منعقدہ پریس سے ملئے پروگرام سے خطاب کرتے ہوئے انہوں نے کہاکہ ملک میں آج بھی 70 سے زائد فیصد آبادی روزانہ محض 25روپیوں کی اجرت پر زندگی بسر کررہی ہے، جبکہ باقی 30 فیصد لوگوں نے ملک کی پوری دولت پر قبضہ کررکھا ہے۔ ملک کی آبادی 125کروڑ سے زائد ہے۔ا ن میں سے 35کروڑ لوگ ناخواندہ ہیں اور ان میں سے بہت سارے اپنا نام تک لکھنا نہیں جانتے۔ 50 فیصد خواتین میں آج بھی مقوی غذا کی کمی کی شکایات ہیں، جس کی وجہ سے شرح اموات اطفال کافی زیادہ ہے۔ 20 کروڑ سے زائد تعلیم یافتہ نوجوان آج بھی بے روزگار ہیں۔ یوروپ اور روس جیسے ممالک میں جہاں تعلیمی سفر کی شروعات کافی تاخیر سے ہوئی کافی ترقی کرچکے ہیں۔ 30 فیصدرعیت پریشان حال ہیں اور مقروض ہونے کے سبب ان میں سے بیشتر خود کشی پر مجبور ہیں۔