نئی دہلی 29/مئی (ایس او نیوز/ایجنسی)  اغوا کرنے کی کوشش کو ناکام بناتے ہوئے دہلی میں نیشنل لیول  شوٹر  اپنے خاندان کے ایک رکن کی جان بچانے میں کامیاب ہوگئی. عائشہ فلک نے اغوا کرنے کی کوشش کرنے کے دوران فوراً حرکت کرتے ہوئے اغوا کنندگان بدمعاشوں کے پیروں پر گولی چلادی اور اُن کی کوشش کو ناکام بنادیا۔ پولس ذرائع سے ملی اطلاع کے مطابق عائشہ فلک نے بعد میں اپنے آپ کو پولس کے حوالے کردیا، یہ واقعہ اتوار کو دہلی کے بھجن پور میں پیش آیا۔

ذرائع سے ملی اطلاع  کے مطابق عائشہ فلک  ایک  قومی سطح کی شوٹر ہے. اس کا شوہر فلک  شیر عالم بھی ایک شوٹر ہے. دونوں ہی نیشنل لیول شوٹر ہیں دونوں ایک پروگرام میں گئے ہوئے تھے. اسی درمیان دونوں کو فون پر اطلاع ملی کہ عالم کے چھوٹے بھائی 21سالہ آصف کو اغوا کرلیا گیا ہے اور اسے چھوڑنے کے بدلے میں 25 ہزار روپے تاوان کا مطالبہ کیا گیا ہے.

بتایا گیا ہے کہ آصف دہلی یونیورسٹی کا  طالب علم ہیں مگر  پارٹ ٹائم میں ٹیکسی  چلاتا ہے.ٹیکسی چلانے کے دوران دو مسافر جن کی شناخت رفیع اور آکاش کی حیثیت سے کی گئی ہے دریاگنج نامی مقام پر سوار ہوئے تھے، جہاں سے آصف کا اغوا کرتے ہوئے  اُسے  اپنے بتائے ہوئے راستے پر چلنے کی دھمکی دی اور ٹیکسی کو بھجن پور لے گئے۔ بعد میں اس کی بحٖفاظت رہائی کے لئے گھروالوں کو 25 ہزار نقد رقم کا مطالبہ کیا۔

اطلاع ملتے ہی عائشہ اور اس کے شوہر نے پولس کو واقعے کی جانکاری دی اور پولس کے ساتھ ہی شاستری پارک پہنچی، جہاں اغوا کاروں نے پہلے رقم لے کر پہنچنے کے لئے بلایا تھا، اغوا کاروں نے جب دیکھا کہ پولس بھی موجود ہے تو وہ وہاں سے بھجن پورا کی طرف بھاگ نکلے اور کہا گیا کہ وہ اکیلے بھجن پورا پہنچ جائیں۔ عائشہ جو 2015 کے نارتھ زون شوٹنگ مقابلے میں تیسرے نمبر پر کامیاب ہوکر برانز میڈل جیتا تھا، اپنی  32 بور پستول کے ساتھ متعلقہ مقام پر پہنچ گئی، جہاں پہنچتے ہی اس نے  اغوا کار پر گولی چلادی، اس کی پہلی گولی ایک اغوا کار کی کمر کو جالگی، جبکہ دوسری گولی  اُس کی ٹانگ  کو لگی، مگر اس کے بائوجود انہوں نے آصف کو اپنے ساتھ ہی لے کر بھاگنے کی کوشش کی، مگر اُس وقت تک پولس نے اُنہیں پکڑلیا۔ پولس نے عائشہ کی بروقت کاروائی پر اُس کی تعریف کی اور اُس کا شکریہ بھی ادا کیا کہ اُس کے صحیح نشانے سے اغوا کاروں کو پکڑلیا گیا اور آصف کو بھی بچالیا گیا۔