نیشنل ہیرالڈ کیس:دہلی ہائی کورٹ کا حکم، ینگ انڈیا 10 کروڑ روپے قسطوں میں جمع کرے
نئی دہلی ،19؍ مارچ ( ایس او نیوز؍آ ئی این ایس انڈیا) دہلی ہائی کورٹ نے نیشنل ہیرالڈ کیس معاملے میں ینگ انڈیا پرائیویٹ لمیٹڈ کمپنی کو دو قسطوں میں 10 کروڑ روپے جمع کرنے کا حکم دیا ہے۔حکم میں کہا گیا ہے کہ 5 کروڑ کی پہلی قسط 5 اپریل سے پہلے اور دوسری 15 اپریل سے پہلے جمع کرے۔ دراصل ینگ انڈیا کمپنی نے ہائی کورٹ میں عرضی داخل کرکے انکم ٹیکس کے 249.15روڑ کے ٹیکس کے نوٹس پر اسٹے لگانے کی مانگ کی تھی۔ انکم ٹیکس نے ٹیکس پروسوڈنگس پر کارروائی کرتے ہوئے 249.15 کروڑ روپے ینگ انڈیا کمپنی کو جمع کرنے کے لئے کہا تھا۔واضح رہے کہ کانگریس صدر سونیا گاندھی اور نائب صدر راہل گاندھی اسٹیک ہولڈر ہیں۔ یہ معاملہ بھارتیہ جنتا پارٹی (بی جے پی) لیڈر سبرامنیم سوامی کی شکایت سے منسلک ہے، جنہوں نے وائی آئی کے ذریعہ ایسوسی ایٹڈ جرنل لمیٹڈ (ایجیایل) کے منافع میں دھوکہ دہی کا الزام لگایا تھا۔ایجیایل نیشنل ہیرالڈ کی اشاعت کرنے والی کمپنی تھی۔ وائی آئی کمپنی میں سونیا گاندھی اور راہل گاندھی کے پاس 38-38 فیصد حصے داری ہے۔ سوامی کا الزام ہے کہ کانگریس نے وائی آئی کو ایجیایل کو خریدنے کے لئے غیر محفوظ قرض دیا تھا۔ معاملے میں سونیا اور راہل کے علاوہ کانگریس لیڈر موتی لال ووہرا، آسکر فرنانڈیز، سمن دوبے، سیم پترودا اور وائی آئی ملزم ہیں۔