کرناٹک میں ناٹک جاری: یڈی یورپانے بی جے پی ممبران کو بلایا واپس
بنگلور:19/ جنوری (ایس اونیوز /آئی این ایس انڈیا) کرناٹک کے سیاسی ڈرامہ میں ایک نیا موڑآگیا ہے۔ریاست میں سیاسی بحران کے درمیان بی جے پی کے ریاستی صدر بی ایس یدی یورپا نے بی جے پی پارٹی کے تمام ایم ایل اے کو واپس بنگلور بلایا ہے۔
کرناٹک میں ممبران اسمبلی کی خریدو فروخت کی خبروں کے درمیان ان بی جے پی ممبران اسمبلی کو قومی دارالحکومت سے ملحقہ گروگرام کے ایک سات ستارہ ہوٹل میں شفٹ کیا گیاتھا۔ کانگریس-جے ڈی ایس اتحاد اور ریاست میں حزب اختلاف بی جے پی اپنے قانون سازوں کو خریدو فروخت کرنے کاالزام لگا رہے ہیں۔ کانگریس قانون ساز پارٹی لیڈرسدارمیا کے کرناٹک اسمبلی میں پارٹی کے ممبران کے بی جے پی کی طرف سے خریدو فروخت کرنے کی کوشش کا الزام لگانے کے ایک دن بعدیہ معاملہ سامنے آیاہے۔
کرناٹک کے سابق وزیر اعلی سدارمیا نے کہا تھا کہ کانگریس پارٹی نے اپنے ممبران اسمبلی کو بی جے پی کی خرید و فروخت سے بچانے کے لئے ایک ریزورٹ میں شفٹ کیا گیا ہے۔224کے رکنی کرناٹک اسمبلی میں کانگریس اور جے ڈی ایس کے 118ایم ایل اے ہیں، جبکہ بی جے پی کے 104ایم ایل اے ہیں۔18جنوری کو کانگریس کے چارغیرمطمئن ایم ایل اے پارٹی کے اجلاس سے غائب تھے۔بی جے پی کے خلاف یکجہتی ظاہر کرنے کے لئے یہ میٹنگ منعقد کی گئی تھی،اگرچہ ان 4 کانگریس ایم ایل اے کی حکومت سے حمایت واپس لینے سے کمارسوامی حکومت کو کوئی خطرہ نہیں ہے کیونکہ 224 رکنی کرناٹک اسمبلی میں اکثریت کے لئے 113اراکین کی ضرورت ہے۔