بنگلورو،2اکتوبر (ایس او نیوز)مشہور اسٹیج آرٹسٹ پرکاش راج  نے وزیر اعظم  نریندر مودی پر طنزیہ تبصرہ کرتے ہوئے کہا ہے کہ مودی ایک بہترین اور بے مثال اداکار ہیں اور مجھے اپنی اداکاری کے لئے جو پانچ نیشنل  ایوارڈ ملے ہیں ، میں وہ سب وزیر اعظم مودی کو دینا چاہوں گا۔

اسٹیج فنکار پرکاش راج  نے یہ تبصرہ ڈی وائی ایف آئی کی طرف سے شہر میں منعقدہ ۱۱ویں ریاستی کنونشن میں کیا۔ پرکاش راج  نے کہا کہ گوری لنکیش کے قاتلوں کا ابھی تک سراغ نہیں ملا ہے ، لیکن اس قتل پر کس نے خوشیاں منائی تھیں سب کو معلوم ہے ۔ اس کے علاوہ سوشیل میڈیا پر ظالمانہ تبصرے کرنے والوں کو خود وزیر اعظم مودی فالو کررہے ہیں۔لیکن گوری کے قتل پر ایک لفظ بولے بغیر انجان بنے رہنے کی جس طرح کی اداکاری وہ کررہے ہیں، اس سے پتہ چلتا ہے وہ مجھ سے بھی عظیم اداکار ہیں اس لئے میں چاہتا ہوں کہ اپنے پاس موجود پانچ ایوارڈ مودی کو ہی دے دوں۔

پرکاش راج  نے نوجوانوں کو آگے بڑھنے اور سیاسی قیادت کرنے کی دعوت دی اور حق و انصاف کی لڑائی میں اپنے بھرپور تعاون کا یقین دلایا۔