کولکا تہ:26/اپریل (ایس او نیوز/آئی این ایس انڈیا) بی جے پی صدر امت شاہ نے آج ترنمول کانگریس کے اس الزام کو مسترد کر دیا کہ نارد سمیت بدعنوانی کے مختلف معاملات میں ترنمول کانگریس کے لیڈروں کو پھنسانے کے لیے سازش رچی گئی تھی۔سازش کے الزام کو مسترد کرتے ہوئے شاہ نے کہاکہ کوئی سازش نہیں رچی گئی۔ترنمول کے لیڈروں کوٹی وی پر پیسے لیتے ہوئے دیکھا گیا،پوری دنیا اسے دیکھ سکتی ہے۔شاہ نے یہاں پریس کلب میں منعقد پریس کانفرنس میں کہاکہ ممتا بنرجی نے بی جے پی فوبیا بنا دیا ہے،وہ ہر چیز کے پیچھے بی جے پی کو ہی دیکھ رہی ہیں۔بی جے پی صدر نے ترنمول کانگریس حکومت پر خوشامدی کی سیاست کرنے کا بھی الزام لگایا اور کہاکہ ریاست میں کوئی بھی صنعت نہیں ہے، یہاں صرف بموں کی صنعت کا فرو غ ہوا ہے، جعلی کرنسی ریاست میں آ رہی ہے اور اسے روکا نہیں گیا۔انہوں نے کہا کہ بائیں بازو کی شکست کے بعد ریاست کی عوام نے سوچا کہ ترقی ہو گی لیکن ترنمول کانگریس کی حکومت میں بھی بنگال پچھڑتا ہی رہا۔انہوں نے دعوی کیا کہ جہاں بھی بی جے پی اقتدار میں ہے، وہاں ترقی ہوئی ہے۔شاہ نے ممتا بنرجی کے اس الزام پر کچھ بھی کہنے سے انکار کر دیا کہ بی جے پی ایسی پارٹی ہے جس نے فرقہ وارانہ فسادات کروائے ہیں۔