نالا سوپارا دھماکہ خیز مادہ برآمدگی معاملہ میں گھاٹکوپار سے ایک گرفتار
ممبئی 25اگست (ایس او نیوز؍آئی این ایس انڈیا) نالاسوپارا دھماکہ خیزمادہ برآمدگی معاملہ میں اے ٹی ایس نے گھاٹکوپار علاقے سے اویناش پوار نامی مشتبہ ملزم کو گرفتار کیا ہے۔اویناش پوار کے گھر سے کمپیوٹر ڈسک اور دیگر اشیاء برآمد کی گئی ہیں۔ اے ٹی ایس ہفتے کے روز عدالت میں پوارکو پیش کرنے کی تیاری کررہی ہے۔ اس معاملہ میں اے ٹی ایس نے اب تک 5 افراد کو گرفتار کیا ہے۔ معاملہ کی گہرائی سے تحقیقات کی جاری ہے۔
موصولہ اطلاعات کے مطابق گھاٹکوپار علاقے میں ہفتہ کی صبح اویناش پوار کو گرفتار کیا گیا ہے۔ 2 سال قبل سرکاری ملازمت میں اویناش پوارکی تقرری ہوئی تھی۔ اسی دوران اس کا تعلق شدت پسند تنظیموں سے ہوا۔ تحقیقات میں اس طرح کی معلومات سامنے آئی ہیں۔ اس معاملہ میں ویبھو راوت، شرد کلسکر، سدھنوا گوندھلیکر، سچن انڈورے کو اے ٹی ایس گرفتار کر چکی ہے۔ ان ملزمان سے تحقیقات میں اہم انکشافات ہو رہے ہیں۔ تحقیقات میں اویناش پوار کے نام کا پتہ چلا، جس سے اے ٹی ایس پچھلے کئی دنوں سے اس پر نظر رکھے ہوئے تھی۔ہفتہ کی صبح پوار کو اے ٹی ایس نے گرفتار کر لیا۔ پوار کی گرفتاری کے بعدکئی دیگر سفید پوش ملزمان پر اے ٹی ایس کی نظر ہے۔