امراوتی، 24 مئی(ایس او نیوز/آئی این ایس انڈیا) ٹی ڈی پی سربراہ این چندرا بابو نائیڈو کل بی جے پی صدر امت شاہ کے ساتھ دوپہر کے کھانے پر ملاقات کریں گے، دونوں پارٹیوں کے تعلقات میں آئی ترشی کو دیکھتے ہوئے یہ ملاقات انتہائی اہمیت رکھتی ہے۔شاہ اپنی پارٹی کے پولنگ سٹیشن درجے کے کارکنوں سے خطاب کرنے کے لئے کل ایک دن کے دورے پر وجے واڑہ جائیں گے۔ ان کا یہ سفر ان کے ملک بھر کے پروگرام کا حصہ ہے۔غور طلب ہے کہ بی جے پی کی تلنگانہ یونٹ نے ٹی ڈی پی سے اپنے تعلقات توڑ لیے ہیں۔ وہیں آندھرا پردیش میں بھی دونوں جماعتوں کے کچھ رہنماؤں کے درمیان کشیدہ تعلقات ہیں، اگرچہ مرکز میں دونوں جماعتیں اتحادی ہیں۔سیاسی مبصرین کے مطابق ٹی ڈی پی کے لئے تلنگانہ میں اتحاد بہت معنی نہیں رکھتا کیونکہ وہاں پارٹی کا بہت کچھ داؤ پر نہیں ہے لیکن آندھرا پردیش میں بی جے پی کا ساتھ اس کے لئے اہم ہے۔لہذا چندرا بابو بی جے پی کے ساتھ اچھے تعلقات کے حق میں ہیں حالانکہ پارٹی کے کئی لیڈر بی جے پی کے ریاستی لیڈران پر الزام لگاتے رہے ہیں۔چندرا بابو اور شاہ حیدرآباد سے ایک ہی جہاز سے یہاں آئیں گے۔