این اے حارث نے فرزند کی حرکت پر اسمبلی میں کی معذرت خواہی
بنگلورو۔20 ؍فروری( ایس او نیوز) رکن اسمبلی این اے حارث کے فرزند نلپاڈ محمد کی طرف سے کل پیر کو ایک طالب العلم کو زودوکوب کرنے کا معاملہ سامنے آنے کے بعد آج این اے حارث نے ریاستی اسمبلی میں معذرت طلب کی اور کہا کہ ان کے بیٹے کی حرکت کی وجہ سے اُنہیں جس طرح ندامت اُٹھانی پڑی، وہ وقت کسی باپ پر نہ آئے۔ بنگلور شانتی نگر اسمبلی حلقہ کے رکن اسمبلی این اے حارث اس موقع پر کہا کہ اگر ان کے فرزند کی حرکت کی وجہ سے ریاستی حکومت اور اسمبلی کے وقار کو دھکا پہنچا ہے تو وہ اس کیلئے معذرت خواہ ہیں۔
منگل کو ریاستی اسمبلی میں ضابطہ 69 کے تحت اپوزیشن لیڈر جگدیش شٹرنے جیسے ہی بحث شروع کی اور حالیہ واقعات کا تذکرہ کیا تو وزیر داخلہ رام لنگا ریڈی نے ان کی بات کا جواب دینے کی کوشش کی جس کے دوران این اے حارث نے مداخلت کرتے ہوئے معذرت خواہی کی۔
انہوں نے کہاکہ کسی پر بھی حملہ کرنا غلط ہے اور یہ دکھ کی بات ہے ایسا واقعہ نہیں ہونا چاہئے تھا۔حارث نے کہاکہ وہ ایک ایم ایل اے ہی نہیں ایک باپ بھی ہیں اور بحیثیت والد شاید اپنی ذمہ داریوں میں کمی کی ہے۔انہوں نے یقین دلایا کہ آئندہ وہ احتیاط برتیں گے کہ اس طرح کی حرکت دوبارہ سرزد نہ ہونے پائے۔
حارث نے کہاکہ انتخابات سرپر ہیں ایسے میں ایک چھوٹے معاملے کو بڑا ایشو بناکر پیش کرنے کی کوشش کی جارہی ہے، انہوں نے کہا کہ اپنے بیٹے نلپاڈ محمد کو خود انہوں نے ہی پولیس کے حوالہ کروایا ہے۔ حارث کے مطابق قانون سے کوئی بھی بالا تر نہیں ہے، اگر نلپاڈ محمد سے غلطی ہوئی ہے تو قانون اسے سزا ضرور دے اس میں وہ کسی طرح کی کوئی مداخلت نہیں کریں گے۔