میسور،25/نومبر(ایس او نیوز)بروز جمعہ ریاستی وزیر اعلیٰ سدارامیا نے میسور کے مہاراجہ کالج میدان میں83 ؍ویں کل ہند کنڑا ادبی سمیلن کا افتتاح کیا تھا۔ کل بروز ہفتہ دوسرے خواتین کو در پیش مسائل پر بحث کی گئی۔ صبح 10بجے منعقدہ اولین سیشن میں تمام مقررین نے صرف خواتین کو درپیش مسائل پر خطاب کیا۔ منگلور یونیورسٹی کی پروفیسر ڈاکٹر سابھیا بھومی گوڈا نے کہا کہ موجودہ حالات میں خاص کر خواتین کو کئی مسائل کا سامنا کرنا پڑ رہا ہے۔ اگر کوئی خاتون راستے پر اکیلی جارہی ہے تو تمام مرد شہوت کی نگاہ سے اسی کو دیکھتے ہیں ۔کوئی کہتا ہے کہ یہ ایک بدچلن عورت ہے، کوئی کہتا ہے کہ یہ بچوں کو اغواکرنے والی عورت ہے اور نہ جانے کیا کیا۔ موجودہ دور میں مرکزی اور ریاستی حکومت دیہی علاقو ں میں خواتین کے لئے بیت الخلاء تعمیر کرنے کے منصوبے پر عمل پیرا ہیں ، لیکن افسوس کے ساتھ کہنا پڑتا ہے کہ آج بھی دہیاتوں میں خواتین کے ساتھ چھیڑ چھاڑ ہوتی ہے اور معاملہ دست درازی اور عصمت ریزی تک پہنچ جاتا ہے۔ ڈاکٹر سابھیا نے تیزاب حملہ کی متاثرہ ایک حسینہ کے حوالے سے بتایا کہاکہ ایک مرد جو ان کے گھر والوں سے ملاقات کے لئے گھر آیا تھااور حسینہ کو دیکھ کر کہا تھا کہ کیوں اس لڑکی پر کئی روپئے خرچ کررہے ہیں اب تو اس لڑکی کی خوبصورتی لوٹ کر نہیں آئے گی اور اس مرد نے حد کو پارکرتے ہوئے گھر والوں کو مشورہ دیا کہ وہ اس لڑکی کو جان سے مار دے۔ آج سماج میں ایک لڑکی کو اس نگاہ سے دیکھا جاتا ہے۔ اور خاص کر شمالی ہندوستان میں خواتین پر مظالم کی تعداد میں دن بہ دن اضافہ ہوتا جارہا ہے۔ کوئمپو انسٹی ٹیوٹ ، کنڑا اسٹڈیز کی ڈاکٹر لولاکشی نے اس موقع پر خطاب کرتے ہوئے کہا کہ آج کل لڑکیوں کے لباس پر بھی بحث کی جارہی ہے اور کس طرح کے لباس پہننا چاہئے چرچے ہورہے ہیں۔ مثلاً مندر جارہی خاتون کو کس طرح کا لباس پہننا چاہئے؟ اگر اس نے لگینز پہن لیا تو وہ موضوع بحث بن جائے گی۔انہوں نے کہا کہ اسکول میں بچوں کو دوپہر کا کھانا اگر ایک دلت خاتون تیار کرتی ہے تو اس پر بحث کی جاتی ہے اور اسکولی بچے اس کھانے کو کھانے سے منع کردیتے ہیں۔ ہمارے سماج میں عورتوں کو عزت اور احترام سے دیکھا جاتاہے اور ایک ماں کا درجہ دیا جاتا ہے۔ اگر وہی عورت کسی پسماندہ طبقے سے تعلق رکھتی ہے تو اس کو گری ہوئی نگاہ سے دیکھا جاتا ہے۔ اور اس عورت کا بائیکاٹ تک کیا جاتا ہے اور بھول جاتے ہیں کہ وہ بھی ایک ماں ہے۔ صدارتی خطاب کرتے ہوئے مشہورخاتون صحافی ڈاکٹر ا وجیا نے خواتین کو آواز دی کہ وہ احساس کمتری اور کمزور ہونے کا احساس تک نہ کریں اور مردوں کی جانب سے اس کے اطراف لگائی گئی پابندیوں کو توڑ کرترقی کی جانب آگے بڑھیں۔ اس موقع پر سامعین کے سوالوں کا جواب دیتے ہوئے کنڑا ساہتیہ سمیلن کے صدر ڈاکٹر منو بلیگار نے کہا کہ یہ غلط ہے کہ سمیلنوں میں منظور کی جانے والی قراردادوں پر عمل نہیں ہوتا بلکہ گزشتہ سال رائچور میں منعقدہ سمیلن کی اکثر قراردادوں پر باقاعدہ عمل ہوا ہے اور اس مرتبہ بھی منظور کی جانے والی قراردادوں پر ضرور عمل ہوگا۔ کنڑا زبان کی ادیبہ ڈاکٹر یم یس آشادیوی نے بھی اس موقع پر خطاب کیا ۔ ڈاکٹر گیتا وسندرا نے تمام سامعین کا خیر مقدم کیا۔ منگلا سریشلا میٹاگڈا نے تمام کا شکریہ ادا کیا۔ ساہتیہ سمیلن کے صدر ڈاکٹرچمپا بھی اس موقع پر موجود تھے۔