میسور کو پاک وصاف شہر کا اعزاز
بنگلورو:29/اپریل(ایس او نیوز) میسور سٹی کارپوریشن کو مسلسل تیسری مرتبہ ملک کے صاف وشفاف شہر کا اعزاز حاصل ہوا ہے۔ وزارت شہری ترقیات نئی دہلی کے ذریعہ اس خصوص میں میسور سٹی کارپوریشن کمشنر کو مکتوب روانہ کیا گیا ہے اور بتایا گیا ہے کہ 4مئی کو منعقد ہونے والی تقریب میں دہلی میں یہ ایوارڈ پیش کیا جائے گا۔اس تقریب میں شرکت کیلئے میئر روی کمار کے علاوہ دیگر افسران دہلی روانہ ہونے والے ہیں۔ ملک کے پانچ سو شہروں میں دوبارہ میسور کو صاف وشفاف شہر کا اعزاز حاصل ہوا ہے۔ جنوری کے دوران مرکزی حکومت کے ذریعہ اس خصوص میں سروے کیا گیا تھاجس کے تحت مرکز کے پانچ افسران نے ایک ہفتے تک میسور میں قیام کرتے ہوئے تمام 60 وارڈوں کا معائنہ کرکے رپورٹ پیش کی تھی۔ 2015 سے مسلسل تیسری مرتبہ میسور کو یہ اعزاز حاصل ہوا ہے۔