میرے بیٹے کو وزیراعلیٰ بننے کانگریس نے دباؤ ڈالا تھا: دیوے گوڈا
بنگلورو،28؍مئی(ایس او نیوز) جنتادل سکیولر کے سربراہ ایچ ڈی دیوے گوڈا نے آج کہاکہ ریاست کرناٹک کے حالیہ اسمبلی انتخابات میں کسی بھی پارٹی کو اکثریت نہ ملنے کے نتائج ظاہر ہونے پر انہوں نے کانگریس کی قیادت والی حکومت کی تائید کرنے کی پیش کش کی تھی۔ لیکن کانگریس ہی نے ایچ ڈی کمار سوامی پر دباؤ ڈالا تھاکہ وہ وزیراعلیٰ بن جائیں۔ گوڈا نے آج کہاکہ کانگریس کے سینئر لیڈر غلام نبی آزاد اور اشوک گہلوٹ کے ساتھ ایک گھنٹہ کی گفتگو کے دوران انہیں بتایاگیا تھا ان کے فرزند کمار سوامی کو وزیراعلیٰ بنانے کا فیصلہ کانگریس ہائی کمان نے کیاہے۔ انہوں نے مزید کہاکہ کانگریس لیڈر غلام نبی آزاد اور اشوک گہلوٹ اور میرے درمیان ہوئی گفتگو کے دوران میں نے کہاتھا کہ آپ حکومت تشکیل دیں تو مجھے کوئی مسئلہ نہیں۔ انہوں نے ہی دباؤ ڈالا تھاکہ کمار سوامی کو وزیراعلیٰ بننے دیجئے۔ یہ کانگریس ہائی کمان کا فیصلہ ہے۔ یہاں منعقدہ ایک اخباری کانفرنس میں گوڈا نے یہ اعتراف کیا۔ ان سے کہاگیا کہ یہ خبریں گشت کررہی ہیں کہ قلمدانون کی تقسیم اور زرعی قرضوں کی معافی کے معاملہ پر جے ڈی ایس کانگریس مخلوط حکومت میں اختلافات جاری ہیں۔ اس لئے کمار سوامی کابینہ کی توسیع میں تاخیر ہورہی ہے۔ اس سوال پر گوڈا نے اشارہ دیا کہ کسانون کو راحت دینے کے وعدے پر عمل کرنا مشکل نظر آرہاہے۔ یہ اس لئے کہ جے ڈی ایس کے صرف 37؍اراکین اسمبلی کے ساتھ ہمیں دیگر پارٹی کی تائید سے حکومت چلانی ہے۔ ہمیں ان کے پروگراموں کو بھی جاری رکھنا ہے۔ ان کی تائید کے بغیر یہ سب مشکل ہے۔
استعفیٰ کی پیش کش: انہوں نے بتایاکہ ان تمام حقائق کے پیش نظر ہی کمار سوامی نے کہاتھاکہ اگر ضرورت پڑے تومیں استعفیٰ دے دوں گا۔ وہ (کمار سوامی) کانگریس کے ماتحت ہیں۔ ریاست کے 6.5؍کروڑ عوام کے ماتحت نہیں۔ وہ حالات کے ہاتھوں بچہ کی طرح ہیں۔ انہوں نے مزید کہاکہ یہ سچ ہے کہ کمار سوامی نے وعدہ کیا تھا کہ ان کی پارٹی اقتدار میں آنے کے 24؍گھنٹوں میں زرعی قرضے تقریباً 53؍ہزار کروڑ روپئے معاف کردیں گے۔ لیکن اب وقت مانگ رہے ہیں کیوں کہ حکومت کانگریس کی تائید سے قائم ہوئی۔ یہ مخلوط حکومت ہے۔ مخلوط حکومت کے ساجھیدار کو اعتماد میں لینے کے علاوہ ریاست کے سرکاری خزانہ کی پوزیشن کا بھی جائزہ لیناہے۔ بی جے پی نے آج ریاست گیر بند منانے کسانوں اور تمام طبقات کو آواز دی ہے کیوں کہ کمار سوامی کسانوں کے قرضے معاف کرنے میں ناکام رہے ہیں۔ کل انہوں نے (کمار سوامی) نے بہت ہی دکھ کے ساتھ کہاتھا کہ وہ کانگریس کے ماتحت ہیں۔ ریاست کے 6.5؍کروڑ لوگوں کے ماتحت نہیں۔ کمار سوامی نے کل یہ بھی کہاتھا کہ وہ کانگریس کے رحم وکرم پر ہیں۔ کرناٹک کے 6.5؍کروڑ لوگوں کے رحم پر نہیں کیوں کہ ریاست کے لوگوں نے ان کی پارٹی کو مکمل فرمان نہیں دیاہے۔
ہماری چھوٹی پارٹی ہے: دیوے گوڈا نے بتایاکہ کانگریس بڑی پارٹی ہے اور ہماری چھوٹی۔ اہم فیصلے کرنا کانگریس پر منحصر ہے۔ ہم نے اقتدار بھی نہیں مانگا تھا وہ خود ہمارے پاس آئے تھے۔ میں نے کہاتھا کہ کانگریس کی جانب سے ہی کوئی وزیراعلیٰ بن جائے۔ میں تائید کروں گا۔ اس میں کوئی چھپی ہوئی بات نہیں۔ میں اقتدار کے پیچھے بھاگنے والوں میں نہیں۔ ان سے پوچھا گیا کہ کمار سوامی کے اچھے فیصلوں کی کانگریس تائید کرے گی۔ اس کا جواب دیتے ہوئے انہوں نے یہ بات کہی۔ ریاستی اسمبلی میں اپوزیشن بی جے پی لیڈر ایڈی یورپا کی تقریر کو دیوے گوڈا نے بہت ہی گھٹیا قرار دیا۔ انہوں نے کہاکہ اسمبلی کی کارروائی کا ٹی وی پر نظارہ کیاتھا۔ اس طرح کی گھٹیا تقریر ایوان میں میں نے نہیں سنی تھی۔ اپنی تقریر کے دوران ایڈی یورپا نے کانگریس جے ڈی ایس اتحاد کو ناپاک کہتے ہوئے کہاتھاکہ باپ اور بیٹے کانگریس کو ختم کردیں گے۔