بیگو سرائے ،19 ؍اگست (ایس او نیوز؍آئی این ایس انڈیا)مظفر پورشیلٹرہوم جنسی تشدد معاملے میں بہار کی سابق سماجی فلاح وبہبودکی وزیر منجو ورما کی رہائش گاہ پر ہوئے سی بی آئی کے چھاپے کے دوران 50کارتوس ملنے کے بعد ورما اور ان کے شوہر کے خلاف ایف آئی آر درج کر لی گئی ہے۔

سی بی آئی نے جمعہ کو منجو ورما کے پٹنہ میں واقع رہائش اور ان کے بیگو سرائے میں واقع سسرال سمیت ریاست کے چار اضلاع میں ان کے تقریباََ 12ٹھکانوں پر چھاپے مارے تھے۔ تھانے کے انچارج رنجیت کمار رجک نے کہا کہ چھاپے کے دوران ورما کے ارجن ٹولامیں واقع سسرال پارٹی کے گھر سے 50کارتوس ملنے کے بعد ان کے اور شوہر چندرشیکھر کے خلاف مقدمہ درج کیاگیاہے۔پولیس نے بتایا کہ یہ کارتوس مختلف ہتھیاروں کے ہیں۔رنجیت کمار رجک نے کہاہے کہ سی بی آئی کے ایک افسرنے جوڑے کے خلاف ایف آئی آردرج کرائی تھی۔انہوں نے افسر کا نام نہیں بتایاہے۔