بنگلور:10/نومبر(ایس او نیوز/آئی این ایس انڈیا)رام مندرپرملک بھرمیں چھڑی بحث کے درمیان کرناٹک کے وزیرضمیر احمد خان نے کہا ہے کہ ملک کی مسلمان آبادی رام مندر کے خلاف نہیں ہے۔انہوں نے کہا کہ مندر بنے لیکن ساتھ میں مسجد بھی بنے۔بتادیں کہ ضمیر لوگوں کے درمیان دریادلی دکھانے کے لئے زیادہ مشہوررہتے ہیں،کچھ دن قبل ایک ہوٹل میں کھاناپسندآنے پر 25000روپیہ بطورٹپ دینے کے بعد چرچا میں آئے تھے۔ضمیر نے کہا کہ صرف کرناٹک کے ہی نہیں بلکہ پورے ملک کے مسلمان رام مندر کے خلاف نہیں ہیں،رام مندر بنائیں لیکن ہماری مسجد جس کو شہید کی گئی تھی ،اسے بھی بنناچاہئے۔ہم رام مندر کے خلاف نہیں ہیں، ہم صرف اپنا حق مانگ رہے ہیں۔رام مندر کا مسئلہ ایک بار پھر زور پکڑنے لگا ہے ۔بھارتی جنتا پارٹی کے لیڈران جہاں اپنے حامیوں کورام مندرکی یقین دہانی کرا رہے ہیں،وہیں مخالفین بی جے پی پر انتخابات میں رام مندر کا مسئلہ استعمال کرنے کا الزام لگارہے ہیں۔