ہبلی 7؍اکتوبر(ایس او نیوز)وزیر داخلہ رام لنگا ریڈی نے توقع ظاہر کی ہے کہ گوری لنکیش کے قتل کی تحقیقات میں لگی ہوئی اسپیشل انویسٹی گیشن ٹیم (SIT)قاتلوں کو گرفتار کرنے میں بہت جلد اور صد فیصدکامیاب ہوجائے گی۔

اخباری نمائندوں سے گفتگو کے دوران وزیر داخلہ نے بتایا کہ ہبلی میں چل رہے کرکٹ پر جوئے بازی، جسم فروشی ، میٹر بڈّی کاروبار اور غنڈہ گردی جیسے جرائم پر پوری طرح قابو پانے کے احکامات پولیس کو دئے گئے ہیں۔اور اگر پولیس سنجیدگی کے ساتھ ان احکامات پر عمل اور سخت کارروائیاں کرے گی تو پھر جرائم خودبخود ختم ہوجائیں گے۔انہوں نے کہا کہ خواتین اور بچوں کے تحفظ پر پوری طرح دھیان دیا جارہا ہے۔وزیر داخلہ نے کرناٹکا یونیورسٹی ، ستّور اور آنند نگر کے علاقوں میں تین نئے پولیس اسٹیشن قائم کرنے کا بھی اعلان کیا ۔