منڈگوڈ:28/مارچ(ایس اؤنیوز)دفینہ کی تلاش میں مندر  کی مورتیوں کی بے حرمتی کرتے ہوئے توڑ پھوڑ کرکے 2-3 فٹ گڑھا کھودے جانے کا واقعہ تعلقہ کے نیسرگی دیہات کے نواحی علاقہ کی رام لنگیشور مندر میں پیش آیا ہے۔

رام لنگیشور  علاقہ کا قدیم مندر مانا جاتا ہے،پچھلے کئی برسوں سے متعلقہ محکمہ کی ان دیکھی سے مٹی سے بنا  مندر بارش کے پانی سے خستہ حالت کو پہنچاہے ، اب خزانے کی تلاش میں لٹیروں نے مورتیوں کوتوڑ پھوڑ کر تے  ہوئے بے حرمتی کرنے کی واردات پیش آئی ہے۔ مندر کے اطراف کنڑا اور تلگو زبان کے پتھر کے کتبے دیکھے جاسکتے ہیں۔ رام لنگیشور مندر سے قریب 200میٹر دور گج لکشمی مندر کی 15سالہ پرانی مورتیوں کو بھی لٹیروں نے نقصان پہنچایا ہے عوامی سطح پر سننے میں آرہاہے کہ دیہات کی تمام روڈ لائٹ کو بند کرکے لٹیروں نے اس کرتوت کو انجام دیا ہوگا۔ جس مندر میں دفینے کی تلاش کی گئی ہے اس کے اطراف میں جادوٹونا کئے جانے کے نشانات بھی دیکھے گئے ہیں۔