منڈگوڈ:22/فروری    (ایس او نیوز) ہفتم جماعت میں زیر تعلیم ایک متعلم نے پھانسی کے ذریعے خود کشی کرنے کا واقعہ تعلقہ کے مئنلی دیہات میں بدھ کی شام پیش آیا ہے۔ بتایا گیا ہے کہ  والدین سے اُس نے میلے کو لے جانے کی ضد کی تھی، مگر جب والدین اُسے میلے پر نہیں لے گئے تو اسی بات سے ناراض ہوکر اس نے خودکشی کرلی۔

خود کشی کے ذریعے ہلاک ہونے والے متعلم کی شناخت مئنلی دیہات کے کرن پکیرپا وڈّر(14) کی حیثیت سے کی  گئی ہے۔ کرن بدھ کو اسکول گئے بغیر گھر میں ہی رہنے کی اطلاعات موصول ہوئی ہیں۔ دوپہر میں کرن کے والد ہانگل میلے میں شرکت کے لئے نکلے تو کرن ضد کرنے لگا کہ وہ بھی میلے میں آئے گا۔ باپ نے بیٹے کو سمجھاتے ہوئے کہاکہ امتحانات سر پر ہیں تم گھر پر رہ کر پڑھائی کرو، اس وقت میرے ساتھ آنے سے تمہار ا نقصان ہوگا، یہ کہہ کر وہ  چلا گیا۔ اس بات پرذہنی طورپر بچہ کافی مایوس ہوا اور گھر کے پکوان کمرے میں پلاسٹک رسی کو چھت سے باندھ کر خود کشی کرلی۔ یہ  بات والد پکیرپا کی طرف سے منڈگوڈ پولس تھانے میں درج کردہ شکایت میں کہی گئی ہے۔ کیس داخل کرلینے کے بعد پولس جانچ کررہی ہے۔