منڈگوڈ، 21؍نومبر(ایس او نیوز)بیلگاوی کے کتّور میں بی جے پی پریورتن یاترا اجلاس کے دوران مرکزی وزیر مملکت اننت کمار ہیگڈے نے وزیر اعلیٰ سدارامیا کے خلاف جو ہتک آمیز ریمارکس کیے تھے وہ معاملہ اب مختلف رنگ اختیار کرگیا ہے۔

اننت کمار نے اپنے خطاب کے دوران سدارامیا کی تذلیل کرتے ہوئے کہا تھا کہ وہ ووٹ حاصل کرنے کے لئے کچھ بھی کرسکتے ہیں یہاں تک کہ کسی جوتے اٹھانے کے لئے بھی تیار ہوسکتے ہیں۔ان ریمارکس کی مذمت خود وزیراعلیٰ نے دو دن قبل کی تھی۔ لیکن سدارامیا کی حمایت میں اور اننت کمار ہیگڈے کے خلاف فیس بک پر جوابی حملہ کرتے ہوئے جس قسم کی تحریر پوسٹ ہوئی ہے اس کے خلاف اننت کے حمایتی گنیش شیرالی نامی شخص نے منڈگوڈ پولیس اسٹیشن میں شکایت درج کرتے ہوئے کہا ہے کہ اس مضمون سے وزیرمملکت اننت کمار کی تذلیل ہوئی ہے۔ بتایا جاتا ہے کہ چونکہ یہ ہتک عزت کا معاملہ ہے اس لئے اس کو عدالت میں ہی نمٹانے کی ہدایت دیتے ہوئے پولیس تھانے کے افسر نے اپنے ہاتھ اٹھا لیے ہیں۔

فیس بک پرنمّا دیو درگا نامی پیج پر اننت کمار کے خلاف جو جوابی حملہ ہوا ہے اس میں اننت کمار کی تحقیر کرتے ہوئے اس کے لئے "لوفر، نمک حرام" جیسے الفاظ کا استعمال کیا گیا ہے۔اس مضمون میں کہا گیا ہے کہ سدارامیا کی نسل کا رشتہ ان لوگوں سے ملتا ہے جنہوں نے انگریزوں کے سامنے سینہ تان کر ملک کی حفاظت کی ہے جبکہ اننت کمار کی جڑیں ان لوگوں سے ملتی ہیں جو غیر ملکی آریائی ہیں۔ جنہوں نے انگریزوں کے جوتے اٹھانے کاکام کیا تھا۔دھمکی آمیز لہجے میں یہ بھی لکھا گیا ہے کہ مسٹر ہیگڈے نے اگر یونہی زبان درازی جاری رکھی توپھرتم لوگوں کوبھارت سے تمہارے اصلی وطن کی طر ف بھگانا ضروری ہوجائے گا۔اس لئے ہوشیار رہو!