کولکاتہ:3 /فروری (ایس اونیوز /آئی این ایس انڈیا) مغربی بنگال کی ممتا حکومت نے امت شاہ کے بعد اُترپردیش کے وزیراعلیٰ آدتیہ ناتھ کے ہیلی کاپٹرکو بھی اُترنے کی اجازت نہیں دی ہے جس کے ساتھ ہی ادتیہ ناتھ کی ریلی منسوخ ہوگئی ہے۔ اُترپردیش کے وزیراعلیٰ دفتر سے کہا گیا ہے کہ اتر پردیش کے وزیر اعلی یوگی آدتیہ ناتھ مغربی بنگال کے بالوگھاٹ میں ایک ریلی میں شرکت کرنے  والے تھے، مگر ریلی کیلئے اجازت نہیں دی گئی۔ وزیراعلی دفتر سے  کہا گیا ہے کہ مغربی بنگال کی حکومت نے کسی بھی نوٹس کے بغیر ریلی کی اجازت کو مسترد کردیا، جسے لے کرایک بار پھرکشیدگی کی صورت حال پیدا ہوگئی ہے۔

مقامی بی جے پی کے کارکنوں نے بھی ریلی کی منسوخی کے خلاف احتجاج شروع کردیا ہے۔اس دوران یوگی آدتیہ ناتھ نے ریلی کو فون سے خطاب کیا۔

خیال رہے کہ اس سے قبل بی جے پی کے صدر امت شاہ کی بھی مالدہ میں ریلی سے پہلے اجازت کو لے کر تنازعہ ہو گیا تھا۔یوگی کے انفارمیشن مشیر متینجے کمار نے یوگی کی ریلی کو لے کر ممتا حکومت کو نشانے پر لیا ہے۔انہوں نے کہا کہ یہ یوپی سی ایم کی مقبولیت کا اثر ہے کہ ممتا بنرجی نے ہیلی کاپٹر لینڈ کرانے کی اجازت ہی نہیں دی۔

مغربی بنگال بی جے پی کے لیڈر مکل رائے نے بھی اس پر غصے کا اظہار کیا۔انہوں نے کہاکہ وہاں ایک باقاعدہ ہوائی اڈہ ہے، ہیلی کاپٹر کو وہاں زمین پر اُترنے  کی اجازت دینے سے کیوں انکار کیا گیا؟ یہ مغربی بنگال کی حکومت کا ایک غیر جمہوری قدم ہے۔

بتا دیں کہ بی جے پی کے قومی جنرل سکریٹری اور مغربی بنگال بی جے پی ریاستی انچارج کیلاش وجے ورگیہ نے سی ایم یوگی  کے لئے ضلعی انتظامیہ کی طرف سے ہیلی کاپٹر لینڈنگ کی اجازت نہ دئے جانے کو لے کر ممتا بنرجی کی مذمت کی تھی۔انہوں نے کہا تھا کہ جمہوریت میں کسی بھی سیاسی جماعت کی سرگرمیوں کو روکنے کا حق نہیں ہے،ہم ممتا جی کے اس عمل کی مذمت کرتے ہیں۔انہوں نے کہا کہ ہیلی کاپٹر لینڈنگ کی میٹنگ اور اجازت نامہ کی اجازت 3دن سے کی گئی تھی،اجازت اسمبلی میں دی گئی تھی کیونکہ یہ ریلوے انتظامیہ کی زمین تھی۔

یاد رہے کہ کچھ دن پہلے بی جے پی صدر امت شاہ بھی مغربی بنگال میں ریلی کرنے جانے والے تھے۔انہوں نے ریاستی حکومت پر  الزام لگایاتھا کہ ان کے ہیلی کاپٹر کو وہاں اُترنے کی اجازت نہیں دی گئی،تاہم ممتا بنرجی نے واضح کیا تھا کہ ہیلی کاپٹر کو اجازت دی گئی تھی لیکن یہ مسئلہ سیکوریٹی کے بارے میں تھا۔ انہوں نے بتایا تھا کہ بی جے پی غلط معلومات پھیلا کر لوگوں کو گمراہ کر رہی ہے۔