پورنیہ:14/نومبر(ایس او نیوز/آئی این ایس انڈیا)بشنپور پنچایت دوبیلی ڈگروابلاک کے مشہور عالم دین مولانا ابراہیم صاحب ان دنوں سخت علیل ہیں اور ہسپتال میں زیر علاج ہیں ۔ رکن شوری دارالعلوم دیوبند مولانا اسرارالحق قاسمی اور پارلیمانی حلقہ کے ایم پی نے مولانا موصوف کے لئے دعائے صحت کی ہے اور تمام مسلمانوں سے اپیل کی ہے کہ مولانا کی صحتیابی کے لئے دعاؤں کا اہتمام کریں۔انہوں نے کہاکہ مولانا ابراہیم مسلمانوں میں دینی تعلیم کے فروغ اور قرآن و سنت کے علوم کی اشاعت کے لئے اپنی زندگی کو وقف کرنے والے عالم دین ہیں اور انہوں نے پوری زندگی دین کی خدمت میں بسر کی ہے،انہیں ان کی صلاحیت اور تقویٰ کی بنیاد پر مغربی یوپی کے مدرسہ ناشرالعلوم پانڈولی کاچھیالیس سال قبل اکابر علماء نے مہتمم بنایا اوران کی سربراہی میں اس مدرسہ نے بے مثال ظاہری و معنوی ترقیات حاصل کی ہیں اور اس کا سلسلہ جاری ہے۔ مولانانے کہاکہ انہوں نے خاص طورسے سیمانچل کے علاقے میں نور نبوت کا چراغ روشن کرنے میں اپنی ساری زندگی وقف کر دی اور ڈگرواکے پسماندہ اور جہالت کی تاریکی میں ڈوبے ہوئے علاقے میں تعلیمی بیداری کی تحریک چلائی ، یہاں سے سیکڑوں طلباء کو پانڈولی لے گئے اور انھیں دینی تعلیم سے آراستہ کیا ۔ مولانا قاسمی نے دہلی میں دو مرتبہ ہسپتال پہنچ کر ان کی عیادت کی ،پہلی بار تو ان کی حالت نہایت نازک تھی اور وہ بات بھی نہیں کرپارہے تھے مگر دوبارہ ملاقات کے دوران محسوس ہواکہ کچھ افاقہ ہوا ہے اور انہوں نے بات چیت بھی کی ،مولاناقاسمی نے ان کے معالج ڈاکٹروں کی ٹیم سے مل کر مولانا کی صحت کے سلسلے میں تفصیلی جانکاری حاصل کی اور امید ظاہر کی کہ انشاء اللہ ان کا آپریشن کامیاب رہے گا۔ واضح رہے کہ مولانااسرارالحق قاسمی اپنے انتخابی حلقہ کے دورہ کے دوران مولانا ابراہیم کے آبائی گاؤں بھی پہنچے اوران کے گھر جاکر ان کے فرزند قاری نعمان،مولانا سلمان،قاری عدنان ، مولانا ابوذر حنیفی،داماد مولانا سرور عالم قاسمی ودیگر اہل خانہ سے ملاقات کرکے ان کو دلاسہ دیا اور تمام مسلمان بالخصوص علماء و طلباء،ائمہ اور مدارس اسلامیہ کے ذمہ داران سے اپیل کی ہے کہ موصوف کی صحت عاجلہ و کاملہ کے لئے خصوصی دعاء فرمائیں۔گزشتہ جمعرات کو اچانک ہارٹ اٹیک ہواجس کے بعد انہیں دہلی کے صفدر جنگ ہسپتال میں داخل کرایاگیا گیااور انتہائی نگہہ داشت والے یونٹ میں رکھاگیاہے ،ان کے گردے میں بھی تکلیف ہے اورجانچ کے بعد ڈاکٹروں کے مشورہ سے جمعہ کے دن آپریشن طے ہواہے۔