بھٹکل 26/ستمبر (ایس او نیوز) گذشتہ چار سالوں سے بھٹکل انجمن کالج میں لیکچرر کے طور پر خدمات انجام دینے والے محمد یوسف کولا، کو اب انجمن پی یو کالج کا پرنسپال نامزد کیا گیا ہے، جبکہ  عبدالرحیم خان کو نائب پرنسپال کی ذمہ داری سونپی گئی ہے۔ اس بات کی اطلاع انجمن پی یو کالج بورڈ کے سکریٹری جناب جاوید حُسین آرمار نے دی۔ انہوں نے بتایا کہ آج  منگل کو انجمن کالج بورڈ میں ہوئی میٹنگ میں ان باتوں کا  فیصلہ کیا گیا۔

خیال رہے کہ خواتین میں محترمہ رشیدہ باشہ کو نوائط کمیونٹی میں پہلی ہیڈمسٹریس اور پہلی نوائطی  پرنسپال بننے کا شرف حاصل ہے تو مرد حضرات میں محمد یوسف کولا کو پہلے نوائطی پرنسپال ہونے کا شرف حاصل ہوگیا ہے۔ انجمن پی یو کالج فور ویمن کی پرنسپال ڈاکٹر فرزانہ محتشم بھی نوائط کمیونٹی سے تعلق رکھتی ہیں۔

محمد یوسف کولا سن 2013 میں انجمن ڈگری کالج سے منسلک ہوئے تھے، ایک سال بعد 2014 میں وہ انجمن ایم بی اے کالج میں جوائنٹ ہوئے، پھر سن 2015 میں وہ انجمن پی یو کالج میں کامرس لیکچرر کے طور پر خدمات انجام دینے لگے۔ ان کی بہترین خدمات اور طلبہ کے ساتھ ان کے بہترین برتائو  اور پڑھانے کے انداز کو دیکھتے ہوئے ا نہیں گذشتہ سال نائب پرنسپال کے عہدہ کے لئے نامزد کیا گیا تھا، اب انجمن نے مزید قدم بڑھاتے ہوئے انہیں پرنسپال کے عہدہ کے لئے نامزد کیا ہے۔ ان کی عمر 30 سال ہے۔

نائب پرنسپال جناب عبدالرحیم خان  گذشتہ آٹھ  سالوں سے انجمن پی یو کالج میں انگریزی لیکچرر کے طور پر خدمات انجام دے رہے ہیں، وہ سن2003 سے 2007 تک انجمن ہائی اسکول میں انگریزی کے ٹیچر رہے، بعد میں دو سال انہوں نے حیدرآباد میں کام کیا، پھر 2009 سے اب تک وہ انجمن پی یو کالج میں  انگریزی لیکچرر کے طور پر اپنی خدمات انجام دے رہے ہیں۔ نائب پرنسپال نامزد ہونے سے قبل وہ اسٹوڈینٹس ویلفئر افسر کے طورپر بھی اپنی خدمات پیش کررہے تھے۔

خیال رہے کہ انجمن پی یو کالج میں محمد یوسف کولا ، کے ساتھ ساتھ نوائط کمیونٹی کے محمد غسّان چامنڈی، مولوی جعفر فقی بھائو ندوی، عمران کولا اور مولوی دانش عسکری ندوی بھی لیکچرر کے طور پر اپنی بہترین سروس سے طلبا میں اپنی ایک خاص پہچان بناچکے ہیں۔

پرنسپال منتخب ہونے پر جناب محمد یوسف کولا کے لئے بھٹکل کے مختلف اداروں کی جانب سے مبارکبادی کے پیغامات موصول ہورہے ہیں۔ قائد قوم اور مختلف اداروں کے سرپرست جناب ایس ایم سید خلیل الرحمن نے محمدیوسف کولا کو دل کی گہرائیوں سے مبارکباد پیش کرتے ہوئے ان کی تقرری  نوائط کمیونٹی کے لئے نیک فال قرار دیا ہے انہوں نے اپنے پیغام میں نوائط برادری کے نوجوانوں کو تعلیم کے  میدان میں مزید آگے آنے اور قوم و ملت کے اداروں کی باگ دوڑ سنبھالنے کی درخواست کی ہے۔

  مجلس اصلاح و تنظیم بھٹکل کے صدر اور انجمن کے سابق جنرل سکریٹری جناب ایڈوکیٹ مزمل قاضیا ،  جنرل سکریٹری محی الدین الطاف کھروری، بھٹکل مسلم جماعت دبئی کے صدر جناب محمد اشفاق سعدا، جنرل سکریٹری جناب محمد یوسف برماور،  بھٹکل مسلم جماعت جدہ کے صدر جناب نعمان علی اکبرا اور جنرل سکریٹری جناب  عبیداللہ عسکری نے بھی محمد یوسف کولا کو پرنسپال بننے پر مبارکباد پیش کی ہے اور ان کے انتخاب پر نہایت خوشی کا اظہار کیا ہے۔