مدھیہ پردیش میں کانگریس لیڈر کا بھیڑ کو اکسانے والا ویڈیوسامنے آیا
بھوپال، 9؍جون (ایس او نیوز؍آئی این ایس انڈیا )مدھیہ پردیش میں کسانوں کو اکسانے والے کچھ کانگریسی رہنماؤں کے ویڈیو سامنے آئے ہیں۔کانگریس لیڈر اور رتلام ضلع پنچایت کے نائب صدر ڈی پی دھاکڑ کا تین جون کا ویڈیو سامنے آیا ہے۔انہوں نے رتلام میں تقریر کی تھی، اس میں وہ کہتے دکھائی دے رہے ہیں کہ میری بات سنو، یہ دم رکھنا ہے کہ ایک بھی گاڑی آ جائے تو جلا دو۔تھانہ، پولیس سے ڈرنے کی ضرورت نہیں، اگر میں گرفتار ہو جاؤں تو آپ کی جوابدہی ہے ، ڈرنے کی ضرورت نہیں ہے، ہمیں جو کرنا پڑے گا کریں گے۔ڈی پی دھاکڑ 4؍جون سے فرار ہیں اور ان پر مقامی انتظامیہ نے 10ہزار روپے کا انعام بھی رکھا ہوا ہے۔دھاکڑ کی اس اشتعال انگیز تقریر کا نتیجہ یہ ہوا کہ رتلام کے ڈھیلن پور گاؤں میں ہفتہ کو ان کے حامیوں نے کئی گاڑیوں کو آگ کے حوالے کر دیا، جس میں پولیس کی بھی تین گاڑیوں شامل تھیں، اس دوران ہوئے پتھراؤ میں دو پولیس اہلکار بھی زخمی ہوئے تھے۔دوسرا ویڈیو شیوپوری کی ممبر اسمبلی شکنتلا کھٹیک کا ہے، حالانکہ اس ویڈیو کا تعلق مالوا میں ہو رہی کسانوں کی تحریک سے نہیں ہے، کیونکہ شور پوری گوالیار کے قریب ہے، مدھیہ پردیش بالائی علاقہ ہے اور تشدد مالوا میں ہو رہے ہیں ، لیکن وہ جس طرح ویڈیو میں ’تھانے میں آگ لگا دو،تھانے میں آگ لگا دو ‘کہتی نظر آرہی ہیں، اور وہ اپنے ارد گرد کھڑی بھیڑ کو اکسا رہی ہیں۔اس پورے معاملے پر صفائی دیتے ہوئے کانگریس کے لیڈر سچن پائلٹ نے کہا کہ ہم حکومت پر دباؤ بنانے کے لیے کبھی بھی تشدد کی حمایت نہیں کرتے ہیں ۔