کمٹہ، 14؍جون (ایس او نیوز) ابھی دو تین دن پہلے کمٹہ میں پہاڑی کھسکنے کی وجہ سے جو حادثہ پیش آیا تھا ،اس کا جائزہ لینے اور متاثرین سے ملاقات کے لئے ضلع شمالی کینرا کے ایم پی اننت ہیگڈے نے اس مقا م کا دورہ کیا۔

کہا جاتا ہے کہ ایم پی نے اس موقع پرعوام سے صرف ان کا حال احوال پوچھااور اپنے طور پر مرکزی حکومت کی طرف سے کسی قسم کی ریلیف فراہم کرنے کے بارے میں کوئی بھی بات نہیں کی۔

اس طرح محض زبانی ہمدردی جتاکر نکل جانے سے وہاں پر موجود عوام کا پار ہ چڑھ گیا اور انہوں نے کچھ دیر کے لئے نیشنل ہائی وے پر دھرنا دے کر ایم پی اننت کمار کے خلاف اپنا احتجاج درج کروایا۔احتجاجیوں کا مطالبہ تھا کہ انہیں مناسب معاوضہ کے علاوہ کسی دوسرے مقام پر نئے مکانات تعمیر کرکے دئے جائیں۔

خیال رہے کہ ہائی وے کی توسیعی کے سلسلے میں کی گئی کھدائی کے بعد پہاڑی کے کھسکنے اور آس پاس میں واقع گھروں پر پتھر اور مٹی گرجانے سے تین بچے ہلاک اور دس سے زیادہ افراد زخمی ہوگئے تھے۔جنہیں ریاستی سرکار کی جانب سے معاوضہ دینے کا اعلان ضلع انچارج وزیر دیشپانڈے نے پہلے ہی کردیا ہے۔