بھٹکل کے گورٹے نیشل ہائی وے پر بس اور لاری کے درمیان خطرناک ٹکر؛ دس سے زائد زخمی
بھٹکل 24/اکتوبر (ایس او نیوز) یہاں شیرور کے قریب گورٹے نیشنل ہائی وے پر سرکاری بس اور لاری کے درمیان خطرناک تصادم میں دس سے زائد لوگ زخمی ہوگئے جس میں دو کو شدید چوٹیں آئی ہیں۔ حادثہ اُس وقت پیش آیا جب سرکاری بس جو سبرامنیا سے ہبلی جارہی تھی، مخالف سمت سے آرہی لاری سے تیز رفتاری کے ساتھ ٹکراگئی۔ بتایا گیا ہے کہ لاری بھٹکل سے مینگلور جارہی تھی۔
حادثےمیں بس پر سواردو شدید زخمیوں میں ایک کی شناخت اوپندا کا رہنے والا دیانند اور دوسرے کی شناخت ملیکا ارجن شیوما گوڈر کی حیثیت سے کی گئی ہے۔ دونوں کو شدید زخمی حالت میں کنداپوراسپتال منتقل کیا گیا ہے۔ حادثے میں بس اور لاری ڈرائیورکو بھی چوٹیں آئی ہیں جن کی شناخت ماروتی کمار میستا اور منجوناتھ ہنومنت نائک کی حیثیت سے کی گئی ہے۔ جبکہ انیتا منجوناتھ بھنڈاری نامی ایک لڑکی کے سرپر بھی چوٹ لگی ہے۔ دیگر لوگوں کو حادثے میں معمولی چوٹیں آئی ہیں اور سبھوں کو بھٹکل سرکاری اسپتال میں طبی امداد کے بعد گھر جانے کی اجازت دی گئی ہے۔
حادثہ پیر کی شام قریب 8:30 بجے پیش آیا۔ حادثہ کے فوری بعد پورا نیشنل ہائی وے بند ہوگیا، مگر پولس نے بروقت کاروائی کرتے ہوئے دونوں سواریوں کو الگ کرکے ہائی وے پر ٹریفک نظام کو بحال کیا، جبکہ مقامی لوگوں کی مدد سے سبھی زخمیوں کو بھٹکل سرکاری اسپتال پہنچایا گیا۔
