جائیداد کی رقم کا تنازعہ۔کیا سگے بھائی نے کروایا اپنے بڑے بھائی کا قتل؟
موڈبیدری 18؍اگست (ایس او نیوز) ہوسابیٹو میں اپنے گھر کے پاس سے 11اگست کی شام کو لاپتہ ہوجانے والے سدرشن نامی نوجوان کی لاش 17اگست کو دستیاب ہوئی جس کے سینے اور گلے پر زخم کے نشا ن پائے گئے ہیں۔ شبہ کیا جارہا ہے کہ شاید اس کے چھوٹے بھائی سدھیر نے اس کا قتل کردیا ہوگا۔
موصولہ رپورٹ کے مطابق سدرشن جین(28سال) اور سدھیر کے ماں نے اپنی 2.7ایکڑ زمین 27لاکھ روپوں میں فروخت کردی تھی۔ اور ایڈوانس کے طور اسے 6لاکھ روپے ملے تھے۔اس رقم میں سے سدھیر نے 3لاکھ روپے حاصل کیے تھے اور بقیہ تین لاکھ روپے بھی طلب کرتے ہوئے اپنی بڑے بھائی سدرشن کو ہراساں کررہا تھا۔سدرشن کی الیکٹرانک سامان کی دکان تھی مگر وہ گھاٹے میں چل رہی تھی۔ اس کے باوجود سدھیر اپنے بھائی سے رقم کا مطالبہ کررہا تھا۔
بتایاجاتا ہے کہ 11اگست کی شام کو سدھیر جین نے اپنے بھائی سدرشن جین کو اس کی دکان کے پاس سے اپنی موٹربائک پر گھر جانے کے بہانے بٹھالیا۔ جب وہ گھر کے قریب پہنچے تو وہاں پر سدھیر کاایک دوست سندیپ اور دیگر دو افراد کار میں بیٹھے انتظار کررہے تھے۔ سمجھا جاتا ہے کہ انہوں نے سدرشن کو وہاں سے اپنی کار میں اغوا کرلیا اور بعد میں اس کا قتل کرنے کے بعد لاش کو پھالگونی ندی کے کنارے پر پھینک دیا۔شبہ کیاجارہا ہے کہ سدھیر نے رقم نہ ملنے پر اپنے دوستوں کی مدد سے سگے بھائی کا ہی قتل کروایا ہوگا۔
موڈبیدری پولیس اسٹیشن میں معاملہ درج کرلیا گیا ہے اور تحقیقات جاری ہے۔
