مودی کی مقبولیت کا ردعمل موب لنچنگ ہے : میگھوال
نئی دہلی:21/جولائی(ایس او نیوز/ائی این ایس انڈیا)راجستھان کے الور ضلع میں ایک بار پھر زر خرید ہجو م کے ذریعہ گائے اسمگلنگ کے شبہ میں اکبر نامی ایک مسلم تاجر کو پیٹ پیٹ کر شہید کر دیا گیا۔اس واقعہ پر مرکزی وزیر ارجن رام میگھوال نے کہا ہے کہ وہ اس واقعہ کی مذمت کرتے ہیں لیکن یہ صرف تنہا واقعہ نہیں ہے ہمیں اس کی تاریخ میں جائیں گے. یہ کیوں ہو رہا ہے؟ کون اسے روکے گا؟ 1984 کا سکھ فسادات تاریخ کی سب سے بڑا موب لنچنگ تھا ۔ انہوں نے کہا کہ جیسے جیسے مودی جی مقبول ہوتے جائیں گے ایسے واقعات بڑھیں گے۔ انہوں نے شک ظاہر کرتے ہوئے کہا کہ بہار میں انتخابات کے وقت ایوارڈ واپسی، یوپی انتخابات میں 'موب لنچنگ اور 2019 میں کچھ اور کیا جائے گا۔ مرکزی وزیر نے دعوی کیا کہ مودی جی کی جانب سے شروع کی گئی اسکیموں کا اثر دکھائی دے رہا ہے اور یہی اس کا ردعمل ہے۔ وہیں راجستھان کی وزیر اعلی وسندھرا راجے نے اس واقعہ کی مذمت کی ہے۔ انہوں نے کہا ہے کہ مجرموں کے خلاف سخت کارروائی کی جائے گی۔ غور طلب ہے کہ الور ضلع کے رام گڑھ میں گائے کی تجارت کے شبہ میں اکبرنامی ایک مسلم شخص کو ہجوم نے پیٹ پیٹ کر شہید کردیا ہے ۔ واضح ہو کہ اکبر اور اسلم گائے لے کر جا رہے تھے، تبھی ہجوم نے ان پر حملہ کر دیا، جس میں اکبر کی موت ہو گئی۔ یہ واقعہ جمعہ کی رات پیش آیا اس معاملے کی جانچ کی جا رہی ہے۔