گورنر نے مودی اور شاہ کے اشارے پر غیر آ ئینی کام کیا ہے : سدارمیا
بنگلورو،18؍مئی ( ایس او نیوز؍آئی این ایس انڈیا )کرناٹک کے سابق وزیر اعلی سدارمیانے کانگریس میں کسی طرح کے انتشار کو مسترد کرتے ہوئے آج کہا کہ کل اسمبلی میں ہونے والے فلور ٹیسٹ سے پہلے ان کے تمام رکن اسمبلی کے ساتھ ہیں۔ سدارمیا نے فلورٹیسٹ پر سپریم کورٹ کے احکامات کا خیر مقدم کرتے ہوئے اسے تاریخی بتایا اور کہا کہ بی جے پی کے پاس اکثریت نہیں ہے کیونکہ اس کے پاس صرف 104 سیٹیں ہیں۔ انہوں نے کہاکہ ان کے پاس صرف 104 سیٹیں ہیں۔ ان کے پاس 112 نشستیں نہیں ہیں، ان کے پاس 104 سے زیادہ ایک نشست بھی نہیں ہے کیونکہ دو آزاد ممبر اسمبلی بھی ہمارے ساتھ ہیں۔ کانگریس (78)، جے ڈی ایس (37) اور دو آزاد امیدوار اور بی ایس پی 1کل 118 چونکہ کمار سوامی د و سیٹوں سے جیتے ہیں، یہ 117 پر مشتمل ہے۔ انہوں نے کہاکہ ہم سب ایک ساتھ ہیں۔ ہمارے درمیان اتفاق ہے۔ اس حقیقت کے باوجود ان کے (بی جے پی) کی طرف سے 15 دن کے لئے نہیں کہے جانے کے باوجود گورنر نے انہیں اکثریت ثابت کرنے کے لئے 15 دن کا وقت دیا ہے، کوئی اس سے کیا نتیجہ اخذ کر سکتا ہے؟ سدارمیا نے کہا کہ گورنر نے نریندر مودی اور امت شاہ کی ہدایات پر عمل کیا ہے۔ اگر انہوں نے آئین پر عمل کیا ہوتا تو ایسے فیصلہ نہیں کرتے۔ علاوہ ازیں سدارمیا نے یہ بھی کہا کہ یہ جمہوریت کا قتل ہے اور آئین کی صریح خلاف ورزی ہے۔ انہوں نے کہا کہ سابق میں کبھی بھی کسی وزیر اعلی کو اکثریت ثابت کرنے کے لئے 15 دن کا وقت نہیں دیا گیا تھا۔ دریں اثنا، کانگریس لیڈر غلام نبی آزاد نے الزام لگایا کہ کانگریس ممبر اسمبلی آنند سنگھ حکومت ہند کی’ قید‘میں ہیں ۔