جموں و کشمیر میں مودی سرکارکی پالیسی ناکام ہوئی : محبوبہ مفتی
جموں،21ستمبر(ایس او نیوز؍آئی این ایس انڈیا) پیپلز ڈیموکریٹک پارٹی (پی ڈی پی) صدر اور سابقہ وزیر اعلیٰ محبوبہ مفتی نے جنوبی کشمیر کے ضلع شوپیان میں جموں وکشمیر پولیس کے تین ایس پی اووز کو اغوا کے بعد گولی مار کر ہلاک کرنے کے واقعہ پر اپنا ردعمل میں کہا ہے کہ وادی کشمیر میں مرکزی حکومت کی طاقت پر مبنی پالیسی ناکام ثابت ہوئی ہے۔ انہوں نے کہا کہ ان ہلاکتوں پر غم وغصے کا اظہار کرنے سے متاثرہ کنبوں کو کوئی سکون نصیب نہیں ہوگا۔محترمہ مفتی نے مائیکرو بلاگنگ کی ویب سائٹ ٹویٹر پر اپنے دو سلسلہ وار ٹویٹس میں کہا ’مزید تین پولیس اہلکار دہشت گردوں کی گولیوں کا نشانہ بن کر اپنی جانیں گنوابیٹھے ہیں۔ توقع کے مطابق ہم سب کی طرف سے ان ہلاکتوں پر غم وغصے کا اظہار کیا جائے گا اور ان کی مذمت کی جائے گی۔ بدقسمتی سے اس سے متاثرین کو کوئی سکون نہیں ملے گا‘۔انہوں نے کہا ’پولیس اہلکاروں اور ان کے رشتہ داروں کے اغوا کے واقعات میں اضافہ ہورہا ہے۔ اس سے عیاں ہوتا ہے کہ مرکزی حکومت کی طاقت پر مبنی پالیسی کامیاب نہیں ہوئی ہے۔ مذاکرات، جو کہ مسائل کے حل کا واحد راستہ ہے، کے شروع ہونے کے ابھی کوئی آثارنظر نہیں آرہے ہیں‘۔خیال رہے کہ جنوبی کشمیر کے ضلع شوپیان میں جمعہ کے روز دہشت گردوں نے جموں وکشمیر پولیس کے تین اسپیشل پولیس آفیسرس (ایس پی اووز) کو اغوا کے بعد ہلاک کردیا۔ تاہم ایک پولیس کانسٹیبل کے مغوی بھائی کو رہا کیا گیا۔