مودی حکومت جوانوں کی قربانیوں کو ضائع نہیں جانے دے گی :امت شاہ
جے پور، 18 فروری(ایس او نیوز؍آئی این ایس انڈیا) پلوامہ دہشت گردانہ حملے میں 40ہندوستانی جوانوں کے شہید ہونے کے واقعہ سے ملک بھر میں پھیلے غم و غصہ کے درمیان بی جے پی کے قومی صدر امت شاہ نے پیر کو کہا کہ مرکز کی نریندر مودی حکومت ملک کے جوانوں کی قربانی کو بیکار نہیں جانے دے گی اور فوج معقول جواب دے گی۔جموں کشمیر کے پلوامہ میں ہوئے خود کش حملے اور اس کے بعد کچھ اور فوجیوں کے شہید ہونے کا ذکر کرتے ہوئے شاہ نے کہا کہ آج پورا ملک شہید فوجیوں کے خاندانوں کے ساتھ چٹان کی طرح کھڑا ہے۔
انہوں نے کہاکہ ان جوانوں نے جو ہماری فوج، ہماری سیکورٹی فورسز کی بہادری کی روشن روایت کو آگے بڑھانے کا کام کیا ہے، میں صرف اتنا کہہ سکتا ہوں کہ بی جے پی کی نریندر مودی حکومت ان کی قربانی بیکار نہیں جانے دے گی، ان قربانیوں کا یقینی طور پر معقول جواب ہمارے فوج کے جوانوں کی طرف سے دیا جائے گا۔شاہ نے کہا کہ تمام سیاسی جماعتوں میں بی جے پی واحد ایسی پارٹی ہے جو دہشت گردی کے خلاف قطعی برداشت نہیں کی پالیسی اپناتی ہے۔ انہوں نے کہاکہ دنیا بھر کے لیڈر دہشت گردی کے خلاف ہیں لیکن دہشت گردی کا جواب دینے، اس سے نمٹنے کا جتنا سیاسی عزم ہمارے لیڈر نریندر مودی میں ہے اتنی دنیا کے کسی لیڈر میں نہیں ہے۔شاہ یہاں سورج میدان میں قرارداد مرکز کانفرنس سے خطاب کر رہے تھے۔ کانفرنس میں جے پور شہر، جے پور دیہی اور سیکر لوک سبھا حلقوں کے بوتھ صدور اور مرکز ی کارکنوں نے شرکت کی۔شاہ نے راجستھان کی اشوک گہلوت حکومت کے ابتدائی دور پر بھی چٹکی لی۔ انہوں نے کہا کہ وزیراعلیٰ اورنائب وزیراعلیٰ کی کشیدگی کے سبب ریاست میں ترقیاتی کام ٹھپ ہو گئے ہیں۔بی جے پی صدر نے مرکزی حکومت کی طرف سے حال ہی میں پیش اعلانات کا ذکر بھی اپنی تقریر میں کیا۔اس موقع پر شاہ نے ریاست کے 11 ضلع کواٹر کے لئے لی گئی زمینوں پر شلا پٹیوں کوآن لائن معنون کیا۔ اس سے پہلے پارٹی کے ریاستی مدن لال سینی اور سابق وزیر اعلی وسندھرا راجے نے بھی اپنی بات رکھی۔