مودی حکومت ریزرو بینک کو اپنی مٹھی میں کرنے کی کوشش کر رہی ہے:سابق وزیر خزانہ پی چدمبرم کا مودی پر راست نشانہ

Source: S.O. News Service | By Jafar Sadique Nooruddin | Published on 9th November 2018, 3:30 AM | ملکی خبریں |

کولکاتہ:8/نومبر(ایس او نیوز/آئی این ایس انڈیا)کانگریس کے سینئر لیڈر اور سابق وزیر خزانہ پی چدمبرم نے جمعرات کو کہا کہ مودی حکومت مالی بحران پرقابوپانے کے لیے بھارتی ریزرو بینک (آر بی آئی)کو اپنی مٹھی میں کرنے کی کوشش کر رہی ہے۔چدمبرم نے خبردار کیا کہ اس طرح کی کوششوں کی وجہ سے بڑی مصیبت پیدا ہوسکتی ہے۔انہوں نے الزام لگایا  کہ حکومت نے مرکزی بینک کے بورڈ آف ڈائریکٹرزمیں اپنے چہیتوں کو بھردیا ہے۔حکومت کی کوشش ہے کہ 19ستمبر کو ہونے والی آر بی آئی بورڈ آف ڈائریکٹرز کی میٹنگ میں اس تجویز کو منظور کر لیا جائے۔

سابق وزیر خزانہ نے یہاں کہا کہ حکومت کے سامنے مالی خسارے کا بحران کھڑا ہو گیا ہے،اور وہ اس انتخابی سال میں اخراجات بڑھانا چاہتی ہے،سارے راستے بند دیکھنے کے بعد مایوسی میں حکومت نے آر بی آئی سے اس کے مخصوص فنڈ سے 1لاکھ کروڑ روپے کا مطالبہ کیا ہے۔انہوں نے دعوی کیا کہ اگر آربی آئی کے گورنر ارجیت پٹیل اپنے موقف پر رہتے ہیں تو مرکزی حکومت کی منصوبہ بندی آربی آئی قانون 1934کے سیکشن 7کے تحت ہدایات جاری کرنے کی ہے۔حکومت مرکزی بینک کو ایک لاکھ روپیہ حکومت کے اکاؤنٹ میں منتقل کرنے کی ہدایت دے سکتی ہے۔چدمبرم نے کہا کہ اس بار آربی آئی کی19نومبرکی بورڈ کی میٹنگ کی اہمیت بڑھ  گئی ہے،اس میں کوئی فیصلہ ہوسکتاہے۔انہوں نے کہا کہ اگر آر بی آئی حکومت سے مختلف رائے رکھتی ہے یا آر بی آئی کے گورنر استعفی دیتے ہیں تو بڑی مصیبت پیداہو سکتی ہے۔

ایک نظر اس پر بھی