مودی حکومت کشمیر سے لے کر ترقی کے محاذ تک ہر جگہ ناکام :سونیا گاندھی
نئی دہلی، 6؍جون(ایس او نیوز؍آئی این ایس انڈیا )کانگریس ورکنگ کمیٹی کا اجلاس ختم ہو گیا ہے، اس اجلاس میں راہل گاندھی سمیت کئی لیڈران موجود رہے۔اجلاس سے خطاب کرتے ہوئے کانگریس صدر سونیا گاندھی نے مودی حکومت پر جم کرحملہ بولا۔سونیا نے کہا کہ مودی حکومت گزشتہ تین سالوں میں کشمیر، سیکورٹی اور ترقی ہر معاملے پر ناکام ثابت ہوئی ہے۔غلام نبی آزاد نے اجلاس کے دوران سونیا گاندھی نے جو کہا وہ بھی میڈیا کو بتایا۔اجلاس کے دوران کانگریس صدر سونیا گاندھی جم کر مودی حکومت پر برسیں ۔سونیا نے کہا کہ جہاں ہم آہنگی ہے، وہاں اختلافات بھی ہیں ، سونیا نے کہا کہ جہاں رواداری ہے، وہاں جوش وخروش بھی ہے۔اجلاس میں اپنی تقریر کے دوران سونیانے کہا کہ کشمیر میں مسلسل امن کا ماحول تھا، لیکن اب مسلسل وہاں کشیدگی بڑھ رہی ہے۔سونیا نے اجلاس سے خطاب کرتے ہوئے کہا کہ حال ہی میں آئے جی ڈی پی کے اعدادوشمار بتاتے ہیں کہ جو بھی سابق وزیر اعظم منموہن سنگھ نے نوٹ بندی کے بارے میں کہا تھا ،وہ سچ ثابت ہوا ہے، موجودہ حکومت کے دوراقتدار میں مسلسل غریب، استحصال زدہ اور اقلیتی طبقات کے لیے حالات خراب ہوئے ہیں۔مودی حکومت کے دور میں مسلسل پرتشدد واقعات میں اضافہ ہوا ہے۔جموں و کشمیر کے موجودہ حالات حکومت کی ناکامی کی عکاسی کرتے ہیں ۔
اجلاس کے بعد کانگریس کے سینئر لیڈر غلام نبی آزاد نے مودی حکومت پر نشانہ سادھتے ہوئے کہا کہ این ڈی اے حکومت صرف ٹی وی میں ہیرو نظر آتی ہے، حالانکہ اصل میں زیرو ہے۔انہوں نے کہا کہ اجلاس کے دوران کشمیر کے حالات پر بات چیت ہوئی۔غلام نبی آزاد نے خواتین کے تحفظ پر سوال اٹھاتے ہوئے کہا کہ یہ حکومت ’سب کا ساتھ، سب کا وکاس ‘ کے نعرے کے ساتھ آئی تھی، لیکن خواتین اب بھی محفوظ نہیں ہیں ، یہ حکومت نعروں کی حکومت ہے، جو صرف ٹی وی پر ہیرو نظر آتی ہے، لیکن اصل میں زیرو ہے۔آزاد نے کہا کہ این ڈی اے حکومت کے 3سال پورے ہو گئے ہیں، یہ حکومت کتنی بھی خوشی منائے یا پھر 24گھنٹے کے لیے ٹیلی ویژن پر اپنی تشہیر کرے ، لیکن یہ حکومت ناکام رہی ہے۔آزاد نے کہا کہ کانگریس ورکنگ کمیٹی کے اجلاس میں کشمیر کے موجودہ حالات پر بھی تبادلہ خیال کیا گیا ۔اس حکومت کے دور میں دلت، خواتین اور اقلیت سمیت میڈیا بھی خوف کا شکار ہے۔گزشتہ 3سالوں سے کئی لوگ دب کر رہ رہے ہیں، گزشتہ 24گھنٹوں میں ہم اس کا ننگا ناچ دیکھ رہے ہیں۔آزاد نے مزید کہا کہ ہزاروں کروڑ کا قرض لے کر ایک شخص کرکٹ میچ دیکھ رہا ہے اور یہاں پر میڈیا کو دبایا جا رہا ہے۔
اجلاس ختم ہونے کے بعد کانگریس لیڈر غلام نبی آزاد نے کہا کہ سب سے پہلے کانگریس کی جانب سے اسرو کو مبارکباد دی گئی، گزشتہ 60سال میں جو بھی اسرو نے کام کیا ہے وہ مبارکباد کے مستحق ہے۔کانگریس حکومت نے جو خواب دیکھا تھا وہ پورا ہوتا نظر آرہا ہے۔اجلاس میں کانگریس نائب صدر راہل گاندھی بھی موجود تھے ۔راہل کے علاوہ احمد پٹیل، اشوک گہلوت، اویناش پانڈے، آشا کماری، اے کے انٹونی، کمل ناتھ اور سی پی جوشی بھی 10جن پتھ پہنچے تھے۔کانگریس نائب صدر راہل گاندھی آئندہ 12؍جون کو بنگلور میں ہوں گے۔راہل وہاں پر نیشنل ہیرالڈ کولانچ کریں گے۔ذرائع کا کہنا ہے کہ اجلاس میں ملک کے موجودہ سیاسی حالات پر بحث ہوئی۔میٹنگ میں گؤکشی ، یوپی میں حالیہ نسلی تشدد، مرکزی حکومت کے طریقہ کار، معیشت اور کشمیر سمیت کئی مسائل پر بھی بحث ہوئی۔