مودی کی' من کی بات 'کے مقابلے میں کرناٹک کے وزیراعلیٰ سدارامیا کریں گے اب ' کام کی بات!'
بنگلورو یکم اکتوبر(ایس او نیوز) دیش کے عوام کے ساتھ رابطے کے لئے وزیر اعظم نریندرامودی نے جو' من کی بات 'کے عنوان سے پروگرام شروع کیا تھا اسی طرز پر کرناٹکا کے ریاستی عوام سے رابطہ پید اکرنے کے لئے وزیرا علیٰ سدارامیا نے ' کام کی بات 'کے نام سے پروگرام کا منصوبہ بنالیا ہے۔
آئندہ اسمبلی انتخابات کے پیش نظر سرکاری سطح پرعوام کے ساتھ رابطے میں رہنے اور حکومت کی کارکردگی سے انہیں روشناس کرنے کے لئے تمام دستیاب وسائل اور طریقوں کو استعمال کرنے کے منصوبے بنائے جارہے ہیں۔پتہ چلاہے کہ آکاش وانی اور دوردرشن کے وسیلے سے ڈیجیٹل اسکرین پر ' کام کی بات 'پروگرام نشر کرنے کے لئے 17کروڑ روپے مختص کیے گئے ہیں۔اس ضمن میں ضلع انتظامیہ کو تمام تعلقہ جات میں ڈیجیٹل اسکرین کا انتظام کرنے کی ہدایات بھی جاری کیے جانے کی خبر ہے۔حکومت کی جاری کردہ اسکیموں سے ہونے والے مفید نتائج سے عوام کو آگاہ کرنے کے لئے ہر ضلع میں معلوماتی اتسوا منعقد کیے جارہے ہیں۔اس کے علاوہ ایک نیا چینل بھی شروع کرنے کی منصوبہ بندی کی جارہی ہے۔