کلبرگی قتل معاملے میں این آئی اے، سی بی آئی، کرناٹک، مہاراشٹر حکومت کو نوٹس جاری
نئی دہلی،10؍جنوری (ایس او نیوز؍آئی این ایس انڈیا) سپریم کورٹ نے معروف مصنف ایم ایم کلبرگی کے قتل کی ایس آئی ٹی جانچ کی مانگ کرنے والی عرضی پر جانچ ایجنسیوں این آئی اے اور سی بی آئی اور مہاراشٹر اور کرناٹک ریاست کی حکومتوں کو نوٹس جاری کیا اور چھ ہفتے کے اندر جواب دینے کو کہا۔کلبرگی کا سال 2015 میں قتل کر دیا گیاتھا۔چیف جسٹس دیپک مشرا اور جسٹس اے ایم کھانولکر اور جسٹس ڈی وائی چندرچوڑ کی بنچ نے کلبرگی کی بیوی اوما دیوی کلبرگی کی درخواست پر جانچ ایجنسیوں اور دونوں ریاستوں کی حکومتوں سے اس پر چھ ہفتے کے اندرجواب دینے کو کہا۔کلبرگی کی بیوی کی جانب سے دائر درخواست میں الزام لگایا گیا ہے کہ ان کے شوہر کے قتل کے معاملے میں اب تک کوئی ٹھوس تحقیقات نہیں کی گئی ہے۔ہمپی یونیورسٹی کے سابق وائس چانسلر کلبرگی کا 30اگست 2015 کو کرناٹک کے دھارواڑ میں کلیان نگر میں واقع ان کی رہائش گاہ پر گولی مار کر قتل کر دیاگیاتھا۔وہ 77 سال کے تھے۔