بھٹکل تنظیم میں کانگریس اُمیدوار منکال ویدیا کی تشریف آوری؛ کئی مسائل پر ہوئی کھل کر بحث؛ منکال نے دی تنظیم کو مکمل تعاؤن کی یقین دھانی
بھٹکل 19 اپریل (ایس او نیوز) رکن اسمبلی اور اگلے انتخابات کے کانگریسی اُمیدوار منکال وئیدیا نے آج بدھ کی شام قریب پانچ بجے قومی سماجی ادارہ مجلس اصلاح وتنظیم بھٹکل دفتر پہنچ کر تنظیم کے اراکین انتظامیہ اور سیاسی پینل کے ممبران سے گفتگو کی اور اپنی جانب سے تنظیم کو ہرممکن تعاؤن د ینے کا یقین دلایا۔
ویسے تو میٹنگ میں میڈیا والوں کوبھی اندر جانے کی اجازت نہیں تھی، البتہ مختلف ذرائع سے جو اطلاعات موصول ہوئی ہیں، اُس کے مطابق میٹنگ میں منکال وئیدیا سے کئی متنازعہ مسائل پر بھی گفتگو کی گئی اور کئی ایک نے مہذب انداز میں اُن سے سوالات کئے اور خبر ملی ہے کہ منکال وئیدیا نے بھی ہر مسئلہ پر کھل کر گفتگو کی اور تمام سوالات کے اطمینان بخش جوابات دینے کی کوشش کی۔
ذرائع سے ملی اطلاع کے مطابق منکال وئیدیا نے کہا کہ وہ تنظیم کی بے حد عزت کرتے ہیں اور تنظیم کے ساتھ ہر طرح کا تعاؤن کرنے کے لئے تیار ہیں۔ جالی پنچایت کا معاملہ ، جالی پنچایت دفتر کی منتقلی، ڈرینیج سسٹم و دیگر معاملوں پر بھی سوالات کئے گئے اور منکال وئیدیا نے سلجھے ہوئے انداز میں جوابات دیئے۔ قریب ایک گھنٹے کی میٹنگ کے بعد انہیں بتایا گیا کہ عنقریب تنظیم کی جانب سے اطراف کے علاقوں کے ذمہ داروں سے بھی گفت وتشنید کی جائے گی ، جس کے بعدہی تنظیم اپنا حتمی فیصلہ سنائے گی ۔
ذرائع کی مانیں تو تنظیم مختلف علاقوں کی جماعتوں کے ذمہ داروں کے ساتھ میٹنگ کرتے ہوئے حتمی فیصلہ لے گی ۔ دیکھنا یہ ہے کہ تنظیم اب کس نتیجہ پرپہنچتی ہے۔