وہاٹس ایپ پر مدد کی اپیل کرنے والے مریض کو ایم ایل اے منکال وئیدیا نے دیا مالی تعاون
بھٹکل 9؍اکتوبر(ایس او نیوز)رکن اسمبلی منکال وئیدیا کے تعلق سے عام طور پر دیکھا گیا ہے کہ جب بھی وہ کسی کو تکلیف اور مصیبت میں دیکھتے ہیں تو آگے بڑھ کر ممکنہ مالی امداد کرتے اور عوام کا دل جیتنے کی کوشش کرتے ہیں۔
اس طرح کا ایک تازہ معاملہ سامنے آیا ہے کہ کچھ دنوں قبل سانپ کے کاٹنے سے پیر کا زخم سڑنے سے پریشان سونارکیری کے کرشنا مورتی شیٹھ نے وہاٹس ایپ پر مالی تعاون کی اپیل کی تھی۔ جب یہ اپیل ایم ایل اے منکال وئیدیا کی آنکھو ں سے گزری تو انہوں نے متعلقہ مریض کے گھر خود جاکر اس کا حال دریافت کیا اور اپنی طرف سے نقد مالی تعاون فراہم کرتے ہوئے سرکاری فنڈ سے مزید امداد کا بھروسہ دلایا۔اس کے علاوہ پچھلے دنوں بندر روڈ پر سڑک حادثے میں ہلاک ہونے والے تالگوڈ کے ناگپا نائک کے گھر جاکر بھی ان کے اہل خانہ سے تعزیت کی اور نقد مالی تعاون فراہم کیا۔
اس موقع پر ایم ایل اے کے ساتھ بلاک کانگریس صدر وٹھل نائک، جئے کرناٹکا پارٹی کے صدر سدھاکر نائک، بلدیہ رکن وینکٹیش نائک، ، دنیش شیٹھ، ہریش شیٹھ اور ستیہ نارائن شیٹھ وغیرہ موجود تھے۔