بنٹوال26؍جون (ایس او نیوز) ایس ڈی پی آئی کے مقتول صدر محمد اشرف کلائی کے گھر پہنچ کرجب ضلع انچارج وزیر رماناتھ رائے نے گھر والوں سے ملاقات کی تو اس موقع پر وہاں کے نوجوان اپنا احتجاج جتانے کے لئے وزیرکے راستے میں ان کی طرف پیٹھ کرکے قطار میں کھڑے ہوگئے ، اور ان کی طرف دیکھنا بھی گوارا نہیں کیا ۔ یہاں تک کہ وزیر موصوف کی اشرف کے گھر والوں سے اس ملاقات کی تصویر نکالنے کی راہ میں رکاوٹ پیدا کی۔

نوجوانوں کا کہنا تھا کہ محمد اشرف کے قاتل کانگریسیوں کے قریبی اور شناسا ہونے کے علاوہ کانگریسی لیڈروں کی اولاد بھی ہیں۔وہ لوگ ہندتوا وادی تنظیموں میں شامل ہوکر مسلمانوں پر ظلم ڈھانے اور پرتشدد کارروائیوں میں ملوث ہونے کی ساری باتیں کانگریسی لیڈروں کو معلوم ہونے کے باوجود وہ لوگ سیاسی مفاد کے لئے ایسے قاتلوں سے نہ صرف قریبی روابط بنائے رکھتے ہیں بلکہ ان کے ساتھ بزنس پارٹنرشپ میں بھی لگے ہوئے ہیں۔لہٰذا کانگریسی وزیر کی اس آمد اپنا احتجاج درج کروانے کے لئے انہوں نے یہ نیا طریقہ اپنایا۔اس موقع پر پولیس کا کافی بندوبست کیا گیا تھا۔