لنگایت فرقہ کو علیحدہ دھرم کے درجہ پر بی جے پی اپنا موقف واضح کرے: شرن پرکاش
بنگلور20مارچ (ایس او نیوز؍آئی این ایس انڈیا) لنگایت فرقہ کو علیحدہ مذہب کی حیثیت سے تسلیم کرنے کے لیے کرناٹک کابینہ میں مرکزی حکوت سے سفارش کرنے کا فیصلہ کیاہے ۔ اس پر بی جے پی کو اپنا موقف واضح کرناچاہیے ۔ یہ بات ریاستی وزیر طبی تعلیم و نگران ضلع گلبرگہ ڈاکٹر شرن پرکاش پاٹل نے آج یہاں ایک پریس کانفرنس میں کہی ہے۔انھوں نے کہا کہ بی جے پی کو ویر شیوا ،لنگایتوں کے ووٹ چاہئیں لیکن انھیں سہولتیں دلانے کی بی جے پی مخالف ہے۔ انھوں نے کہا کہ بی جے پی اس کی مخالفت کیوں کرتی ہے۔ ریاست کے عوام بی جے پی کے رویہ کو دیکھ رہے ہیں ۔ بی جے پی اگر اپنا موقف واضح نہیں کرے گی تواسے عوامی غیض و غضب کاسامناکرناپڑے گا۔ انھوں نے کہا کہ حکومت کرناٹک کے فیصلہ کا ویر شیوا مہا سبھانے خیر مقدم کیا ہے۔ لیکن لنگایت ویرشیواکے پنچ پیٹھ اس کی کیوں مخالفت کررہے ہیں ۔ یہ بات ناقابل فہم ہے۔ انھوں نے کہا کہ لنگایت فرقہ کو علیحدہ آزادانہ مذہبی شناخت دیئے جانے کا ریاستی کابینہ نے فیصلہ کیا ہے اور آج ہی اس فیصلہ سے مرکزی حکومت کو واقف کرواتے ہوئے لنگایت دھرم کو علیحدہ مذہب کی حیثیت سے تسلیم کرنے کی سفارش کی گئی ہے۔