بنگلورو،19؍جون(ایس اونیوز) آر ایس ایس لیڈر کلڈکا پربھاکر بھٹ کے خلاف کارروائی کرنے دکشن کنڑا ضلع کے ایس پی کو وزیر جنگلات بی رمناتھ رائے کی طرف سے ہدایت کے نتیجہ میں انہیں قتل کی دھمکی ملی ہے۔ بتایا جاتاہے کہ رمناتھ رائے کے فون پر کسی نے کال کرکے یہ دھمکی دی ہے کہ کلڈکا پربھاکر کے خلاف اگر جھوٹے الزامات لگائے گئے تو خاموش نہیں رہے گا اور رمناتھ رائے کو اس کی قیمت جان دے کر چکانی پڑسکتی ہے۔ اس شخص نے وزیر سے کہا کہ کلڈکا بھٹ ہندو مذہب کی بقا کیلئے اپنی زندگی داؤ پر لگاچکے ہیں ، ایسے شخص کے خلاف اگر جھوٹے الزامات لگائے گئے تو وزیر موصوف کا کیا ہوگا دیکھا جائیگا۔ اس کے بعد فون کرنے والے نے اپنا کال منقطع کردیا۔ دوبارہ کال کرکے اس نے وزیر موصوف سے کہا ہے کہ وہ کلڈکا پربھاکر کوچور نہ کہیں ، اگر یہی رویہ برقرار رہا تو اس کا انتقام لیا جائے گا۔اس نے یہ بھی کہاکہ بہت جلد رمناتھ رائے کو جیل کی ہوا کھلائی جائے گی۔ ہندومذہب کی توہین کرکے مسلمانوں کے ووٹ حاصل کرنے کا خواب دیکھ کر ایسی بیان بازی نہ کریں۔ اس کا نتیجہ آئندہ کیا ہوگا اور انتخاب میں کس طرح کامیاب ہوں گے یہ آنے والے دن ہی بتائیں گے۔اس کال کرنے والے نے کہاکہ دکشن کنڑا میں تشدد کس نے مچایا ہے اس سے وزیر موصوف بھی واقف ہیں پھر بھی وہ ایک مخصوص طبقے کو خوش کرنے کیلئے آرایس ایس کو بدنام کرنا چاہتے ہیں۔ دکشن کنڑا ضلع میں کانگریس کی حالت کیا ہے اس سے سب واقف ہیں۔ 2013میں چند وجوہات کے سبب کانگریس کامیاب ہوئی تھی، 2018میں ضلع سے کانگریس کا نام ونشان مٹادیا جائے گا۔