گوا میں کرناٹکا کی مچھلیوں پر پابندی : سرکاری سطح پر کوئی اطلاع نہیں : وزیر وینکٹ راؤ ناڈ گوڈا
بھٹکل: 30؍اکتوبر (ایس او نیوز) گوا میں کرناٹکا کی مچھلیوں پر عائد کی گئی پابندی کے متعلق ریاستی حکومت کو سرکاری طورپر کوئی مصدقہ اطلاع نہیں ہونے کی کرناٹکا کے وزیر برائے مویشی پالن اور ماہی گیری وینکٹ راؤ ناڈگوڈا نے جانکاری دی۔
وہ یہاں بھٹکل میں منگل کو کوسٹل کنگ ویلفئیر اسوسی ایشن کے خون عطیہ کیمپ میں شرکت کے بعد ساحل آن لائن سے گفتگو کررہے تھے ۔ ساحل آن لائن کی طرف سے پوچھے گئے سوالات پر وضاحت کرتے ہوئے موصوف وزیر نے کہاکہ اس سے قبل بھی میڈیا میں ساحلی پٹی کی مچھلیوں میں فارمالین کے ذرات ہونے کی خبریں پھیلائی گئی تھیں، یہاں کے مچھلیوں کی مشہور لیباریٹری میں جانچ کرائی گئی تو مچھلیوں میں کوئی فارمالین کے ذرات نہیں پائے گئے۔ اب پھر وہی بات دہرائی جارہی ہے۔ گوا میں کرناٹکا کی مچھلیوں پر پابندی کیوں عائد کی جارہی ہے اس کے وجوہات جاننے کے بعد سرکار آئندہ اقدام اٹھانے کی بات کہی۔ کرناٹکا میں لائٹ فشنگ پر پابندی عائد ہے، اب کہیں بھی لائٹ فشنگ نہیں ہورہی ہے، پابندی جاری رہنے کی بات ایک سوال کے جواب میں کہی۔
کرناٹکا میں ہورہے 5حلقوں کے ضمنی انتخابات پر پوچھے گئے سوال پر وینکٹ راؤ گوڈا نے پُر اعتماد لہجے میں کہاکہ ضمنی انتخابات میں مخلوط حکومت کے امیدوار پورے پانچ حلقوں میں جیت حاصل کریں گے۔ انتخابی نتائج کے بعد بی جےپی کو پتہ چلے گا کہ مخلوط حکومت کتنی مضبوط ہے اور بی جے پی کو سوائے مایوسی کے اور کوئی ہاتھ نہیں لگے گا۔