انکم ٹیکس سے جڑے کیس میں ڈی کے شیوکمار کو ضمانت
بنگلورو،15؍ستمبر(ایس او نیوز) ریاستی وزیر برائے میڈیکل ایجوکیشن وآبی وسائل ڈی کے شیوکمار کو آج اس وقت راحت ملی جب انکم ٹیکس معاملے میں خصوصی عدالت نے انہیں ضمانت دے دی۔ اس سلسلے میں محکمۂ انکم ٹیکس کی طرف سے ان خدشات کو کہ ڈی کے شیوکمار اور اس کیس کے دیگر ملزمین چونکہ بہت ہی بارسوخ ہیں ، اسی لئے یہ لوگ مقدمے سے بچنے کے لئے ملک سے فرار ہوسکتے ہیں ، عدالت نے مسترد کردیا اور ڈی کے شیوکمار اور ان کے ساتھیوں کو ضمانت دینے کا فیصلہ سنایا۔
ڈی کے شیو کمار پر مالیاتی جرائم کے سلسلے میں محکمۂ انکم ٹیکس نے مقدمہ دائر کیاتھا ، آج سماعت کے دوران محکمۂ انکم ٹیکس کے وکیلوں نے ڈی کے شیوکمار کو ضمانت دینے کی مخالفت کی ۔ دوران سماعت خود ڈی کے شیوکمار بھی موجود رہے۔ وکیلوں نے کہاکہ کسی بھی حال میں ڈی کے شیوکمار کو ضمانت نہ دی جائے۔ محکمۂ انکم ٹیکس کی طرف سے معروف وکیل پربھو لنگا نے پیروی کی ، تاہم دوپہر تین بجے جب عدالت کی کارروائی شروع ہوئی تو خصوصی جج نے اپنا فیصلہ صادر کرتے ہوئے محکمۂ انکم ٹیکس کے تمام دلائل کو مسترد کردیااور ڈی کے شیوکمار کو 25ہزار روپے اور دس لاکھ روپیوں کے ذاتی مچلکے کی بنیاد پر ضمانت دینے کا فیصلہ سنایا۔ اس کیس میں جس کی وجہ سے بارہا ڈی کے شیوکمار کو ہراساں کیا جارہاتھا اور کیس پر انکم ٹیکس محکمے کی کارروائی کواچھال کر بی جے پی کی طرف سے ریاستی حکومت کے استحکام کو بھی متاثر کرنے کی کوشش کی گئی تھی اب ضمانت ملنے سے ڈی کے شیوکمار کو بہت بڑی راحت ملی ہے۔