اننت کمار ہیگڈے کی موٹرگاڑی سے ہوا سیریئل ایکسیڈنٹ۔ 6 افراد زخمی۔ 4گاڑیوں کو نقصان۔ وزیرہوگئے رفوچکر
بنگلورو 29؍جنوری (ایس او نیوز)مرکزی وزیر برائے اسکِل ڈیولپمنٹ اننت کمارہیگڈے کی موٹرگاڑی اور محافظ دستہ (ایسکارٹ) کا قافلہ جب ایئرپورٹ کی طرف جارہاتھا تو اننت کمار ہیگڈے کے ڈرائیور نے نیشنل ہائی 207پر دیون ہلّی کے قریب سڑک کے گڑھے اور گزرتے ہوئے بندر سے بچنے کے لئے اچانک بریک لگادئے اور اس کے نتیجے میں ایک سیریئل حادثہ ہواجس میں 6/ افراد زخمی ہوگئے اور 4/موٹر گاڑیوں کو نقصان پہنچا ہے۔ لیکن افسوسناک بات یہ ہے کہ وزیر اننت کمارہیگڈے نے ذراسی بھی انسانیت نہ دکھاتے ہوئے جائے حادثہ سے رفوچکر ہونے کو ترجیح دی۔
موصولہ رپورٹ کے مطابق اننت کمار ہیگڈے کے شوفر نے جیسے ہی اچانک بریک لگائے تو ان کی گاڑی ایک اِنوا کار سے ٹکرا گئی۔یہ دیکھ کر وزیر کے ایسکارٹ گاڑی کے ڈرائیور نے بھی فوری بریک لگائے جس کی وجہ سے دوسری گاڑیاں بھی ایک دوسرے سے ٹکراگئیں۔اس طرح کم ازکم پانچ گاڑیوں کو نقصان پہنچا ہے۔حادثے کا شکارہوئی انوا کار میں چکبالاپور کے بابو اور ان کے گھروالے موجودتھے۔ بابو کاکہنا ہے کہ اننت کمار کی گاڑی کی ٹکر سے اس کی بیوی کے دانت ٹوٹ گئے جس سے بہت زیادہ خون بہنے لگا۔ان کی بیٹی جوشنا او ر نواسا نیویل اینتھونی بھی اس حادثے میں زخمی ہوگئے ہیں۔ اس کے علاوہ ایک موٹر بائک سوار کے دونوں ہاتھوں میں فریکچر ہوا ہے۔
ایک مقامی عینی شاہد چندراشیکھر نے کہا کہ’’ اس راستے پر حادثے روز ہوتے ہیں ۔لیکن حادثہ اورکچھ لوگوں کے زخمی ہونے کے باوجود وزیر اننت کمار ہیگڈے نے رُک کر زخمیوں کی خبرگیری کرنے کے بجائے فوراً ایئر پورٹ کی طرف اپنا قافلہ آگے بڑھایا۔وزیریا ان کے محافظین میں سے بھی کوئی باہر نہیں نکلا اور زخمیوں کی مدد نہیں کی۔ پھر وزیر کی ایسکارٹ ٹیم ایک گھنٹے کے بعد جائے حادثے پر واپس پہنچی۔ یہ رویہ ایک وزیر جیسی شخصیت کو زیب نہیں دیتا۔‘‘
پتہ چلا ہے کہ وشواننت پورم پولیس اسٹیشن میں اننت کمار ہیگڈے کے ڈرائیور کے خلاف معاملہ درج کردیا گیا ہے۔
