ایرپورٹ کیلئے میٹرو نہیں ہائی اسپیڈ ٹرین ضروری:سریدھرن
بنگلور:18/مارچ(ایس او نیوز) راجدھانی دہلی میں میٹرو ٹرین پراجکٹ کے معمار اور بنگلور میٹرو ریل پراجکٹ کے بانی ای سریدھرن نے ریاستی حکومت کی طر ف سے بنگلور سے کیمپے گوڈا انٹرنیشنل ایرپورٹ تک میٹرو ریلوے لائن بچھانے کے پراجکٹ کو غیر سودمند قرار دیتے ہوئے کہاکہ اس روٹ پر میٹرو کی بجائے تیز رفتار ٹرین کی سہولت مہیا کرائی جانی چاہئے۔ آج شہر میں ایک تقریب سے خطاب کرتے ہوئے انہوں نے کہاکہ آج ملک میں ضرورت ہے کہ اخلاقیات پر مبنی قیادت کو پروان چڑھایا جائے تاکہ قومی اقدار کا تحفظ ہوسکے۔ انہوں نے کہاکہ انتخابی اصلاحات کے عمل کو اگر تمام سیاسی پارٹیوں نے اپنا کر اسے تیزی سے لاگو کرنے کا ارادہ کیا تو اس سے کافی فائدہ ہوسکتا ہے۔ انہوں نے کہاکہ پیشہ ورانہ تعلیم، سماجی ڈھانچہ، صنعتی شعبے میں ماہرین کی شرکت اور دیگر امور پر کافی حد تک کام ہورہا ہے۔ انہوں نے کہا کہ ملک میں جب تک انتخابی عمل میں اصلاحات لاگو نہیں کی جائیں گی اس وقت تک ذمہ داری اور معیاری قیادت کا پروان چڑھنا ناممکن ہے۔