نئی دہلی، 23 ؍فروری(ایس او نیوز؍آئی این ایس انڈیا) میٹرو شہروں میں اب 2.5 ایکڑ پلاٹ پرکندریہ ودیالیہ بنائے جائیں گے۔ مرکزی حکومت کے اس نئے اصول کے تحت مرکزی وزیربرائے فروغ انسانی وسائل پرکاش جاؤڑیکر نے جمعرات کو شمال مشرقی دہلی کے شاہدرہ میں پہلے کندریہ ودیالیہ کی عمارت کی سنگ بنیاد رکھی۔ اس موقع پر پرکاش جاوڑیکر نے کہا کہ میٹرو شہروں اور دیگر مقامات پر زمین کی کمی کو ذہن میں رکھتے ہوئے حکومت نے نئے کندریہ ودیالیہ کی تعمیر کے لئے زمین کی ضرورت کے معیار میں چھوٹ دینے کا فیصلہ کیا ہے۔انہوں نے کہا کہ 6 میٹرو شہروں میں اب کندریہ ودیالیہ کے لئے صرف 2.5 ایکڑ زمین چاہئے ہوگی جبکہ پہلے اس کے لئے 4 ایکڑ زمین کا معمول تھا۔وہیں ملک کے دیگر مقامات پر اسکولوں کے لئے 8 ایکڑ کے بجائے 5 ایکڑ زمین ہی چاہئے ہوگی۔ جاؤڑیکر نے کہا کہ حکومت سب کو تعلیم فراہم کرنے پر کام کر رہی ہے اورکندریہ ودیالیہ ملک میں معیار ی تعلیم کا ایک متبادل ہے۔ انہوں نے کہا کہ کندریہ ودیالیہ میں داخلے میں بہتر مواقع مہیا کرانے کے لئے اس سیشن سے کندریہ ودیالیہ میں داخلے کے فارم آن لائن بھرے جائیں گے تاکہ لوگوں کو اپنے بچوں کو کندریہ ودیالیہ میں داخلہ کرانے کے لئے دھکے نہیں کھانے ہوں گے۔ جاؤڑیکر نے کہا کہ تدریسی عملے کی کمی کو دیکھتے ہوئے کندریہ ودیالیہ تنظیم نے 6000 سے زیادہ اساتذہ کی بھرتی کا عمل شروع کر دیا ہے۔ انہوں نے کہا کہ طالب علموں کو معیاری تعلیم فراہم کرنے کے لئے حکومت فعال طور پر کام کر رہی ہے۔ اس کا ماننا ہے کہ صرف مناسب اور معیاری تعلیم کے ذریعے ہی مضبوط کردار والے اچھے شہری تیار ہو سکتے ہیں۔

شمال مشرقی دہلی کے لوک سبھا ممبر پارلیمنٹ منوج تیواری نے کہا کہ پرکاش جاؤڑیکر پہلے مرکزی وزیربرائے فورغ انسانی وسائل ہیں جنہوں نے اس علاقے کا دورہ کیا ہے۔ انہوں نے شاہدرہ ضلع میں پہلے کندریہ ودیالیہ کے تعمیر ی کام کی منظوری کے لئے مرکزی وزیر کا شکریہ ادا کیا۔