کنداپور کے قریب گنگولی میں بس کی بائک سے ٹکر؛ بائک سوار ہلاک
کنداپور 4/اپریل (ایس او نیوز) یہاں کے قریبی دیہات گنگولی کے نائکوڑی رام مندرکے بالمقابل مین روڈ پر پیش آئے ایک سڑک حادثہ میں بائک سوار ہلاک ہوگیا، جس کی شناخت مینگلور الیکٹری سٹی کمپنی (میسکام) کے ملازم گنیش دیواڑیگا (60) کی حیثیت سے کی گئی ہے۔
ذرائع نے بتایا کہ گنیش تراسی سے گنگولی کی طرف جارہا تھا کہ گنگولی سے کنداپورکی طرف آنے والی ایک پرائیویٹ بس سے تیز رفتاری کے ساتھ اس کی بائک ٹکراگئی۔ حادثہ بدھ کی دوپہر قریب بارہ بجے پیش آیا۔
حادثے کی اطلاع ملتے ہی گنگولی 24X7 ایمبولنس سروس کے ذمہ داران محمد ا براہیم ایم ایچ اور اکشے کھاروی موقع پر پہنچے اور شدید طور پر زخمی گنیش کو فوری اسپتال لے جانے کی کوشش کی، مگر وہ جانبر نہ ہوسکا اور اسپتال لے جانے کے دوران ایمبولنس پر راستے میں ہی دم توڑ دیا۔
گنیش کے تعلق سے بتایا گیا ہے کہ وہ تین روز قبل میسکام سے تین دن کی چھٹی لے کے تروپتی کی یاترا پر گیا تھا، رات کوہی واپسی ہوئی تھی جس کے بعد آج صبح اس نے واپس ڈیوٹی جوائن کی تھی، مگر دوپہر ہوتے ہوتے اُس کا بلاوا آگیا۔ اس بات کی بھی اطلاع ملی ہے کہ اگلے ماہ یعنی ماہ مئی میں اس کا ریٹائرمنٹ تھا۔