میکے داٹو سمیت تمام آبپاشی منصوبوں کی تکمیل حکومت کا مقصد ہے۔ڈی کے شیو کمار
بنگلورو۔3؍ دسمبر (ایس او نیوز) ریاستی وزیر برائے آبی وسائل ڈی کے شیو کمار نے بتایا کہ ریاستی مخلوط حکومت کا مقصد ایک ایک قطرہ پانی کو بچانا ہے تاکہ اس سے ریاستی عوام اور کسانوں کو فائدہ پہنچے۔
یہاں اخباری نمائندوں سے بات کرتے ہوئے ڈی کے شیوکمار نے اس خیال کا اظہار کیا اور بتایا کہ مخلوط حکومت کے روبرو بے شمار چیلنجرس ہیں اس کے باوجود آبپاشی منصوبوں کو جاری کرنے کی حکومت پابند ہے۔انہو ں نے بتایا کہ اپر کرشنا پراجیکٹ۔3(یو کے پی ۔3) کے تحت جاری منصوبوں کے لئے درکار زمینوں کی حصولیابی حکومت کے لئے ایک بڑا مسئلہ ہے۔کیونکہ زمینات کے مالکوں اور کسانوں کو نئے لینڈ اکویزیشن ایکٹ کے تحت معاوضہ ادا کیا جانا ہے۔
انہوں نے بتایا کہ تنگبھدرا ڈیم کا 31؍ ٹی ایم سی پانی ڈیم میں کچرا بھر جانے کی وجہ سے نا قابل استعمال ہوجائے گا اس لئے متبادل ڈیم تعمیر کرنے کے لئے ضروری قدم اٹھایا جائے گا۔انہو ں نے بتایا کہ مہادائی ٹرائی بیونل کا فیصلہ کی روشنی میں مہادائی اسکیم کو مکمل کرنا ہے۔اسی طرح ایتنا ہولے پراجیکٹ کو بھی مکمل کیا جانا ہے، جبکہ میکے داٹو اسکیم کو مخلوط حکومت سے ہر طرح کی اجازت حاصل کی جائے گی اور اس اسکیم کی ریاست کو ضرورت کے تعلق سے تملناڈو حکومت کو تفصیل پیش کرکے اعتماد میں لیا جائے گا۔
انہو ں نے بتایا کہ شہر بنگلور تیزی سے پھیلتا جارہا ہے اور مستقبل میں پانی کی مانگ میں اضافہ ہوگا اور میکے داٹو اسکیم کی تکمیل سے شہر بنگلور کی آبی ضرورت پوری ہوگی۔
شیوکمار نے بتایا کہ کاویری، کرشنا سمیت ریاست کے تمام علاقوں کے آبی وسائل ورابطہ کو ترقی دی جائے گی۔اس کے علاوہ مختلف آبپاشی اسکیموں کو وقت مقررہ پر پورا کیا جائے گا۔انہوں نے بتایا کہ تقریباً ایک لاکھ کروڑ لاگت کے مختلف پراجیکٹس جاری کئے جائیں گے جن میں اکثر کاموں کے لئے ٹنڈر کی کارروائی مکمل ہوچکی ہے۔