سری نگر،12اگست(ایس او نیوز؍آئی این ایس انڈیا)بی جے پی کے دو ممبران اسمبلی نے دفعہ 35 اے کی حمایت کی ہے، جس کے بعد سابق وزیر اعلی محبوبہ مفتی نے ہفتہ کو کہا کہ جموں و کشمیر کے خصوصی درجہ کو برقرار رکھنا اب کسی ایک خاص علاقہ یا مذہب تک محدود نہیں رہ گیا ہے، کیونکہ لوگوں کو اس کی اہمیت کا احساس ہوگیا ہے۔

محبوبہ مفتی جموں علاقہ کے دو بی جے پی ممبران اسمبلی کے آئین کی دفعہ 35 اے کی حمایت میں اپنی آواز بلند کرنے کی رپورٹوں کا حوالہ دے رہی تھیں۔ محبوبہ مفتی نے ٹویٹر پر کہا کہ یہ جانکار اچھا لگا کہ بی جے پی کے دو ممبران اسمبلی راجیش گپتا اور ان کے بعد ڈاکٹر گگن نے دفعہ 35 اے کی حمایت میں اپنی آواز بلند کی ہے۔

انہوں نے کہا کہ ان کی حکومت نے سپریم کورٹ میں قانونی طور پر اس معاملہ میں لڑائی لڑی، جبکہ وہ اس سیاسی لڑائی میں اکیلے دم پر اس بات پر زور دیتی رہی ہیں کہ دفعہ 35 اے کو کسی طرح سے کمزور کرنے سے ریاست میں آگ لگ جائے گی۔ مفتی نے کہا کہ آج مجھے تسلی ہے کہ جہاں تک جموں و کشمیر کے خصوصی درجہ کو بچانے کا سوال ہے، سیاسی نظریہ یا وابستگی کی پروا کئے بغیر ہم سب ایک راہ پر ہیں۔