اناہزارے پھرجاگے، کیجریوال پرکسا طنز،کہا:سادگی کا وعدہ کرکے گاڑی، بنگلے لے لیے کھو دیااعتماد
نئی دہلی، 26/اپریل (ایس او نیوز/آئی این ایس انڈیا)سماجی کارکن انا ہزارے جاگ گئے ہیں لیکن وہ صرف آپ یاکانگریس کے معاملہ میں ہی بیدارنظرآتے ہیں۔اب انہوں نے دہلی ایم سی ڈ ی انتخابات میں عام آدمی پارٹی کی شکست کو لے کر اروند کیجریوال پر نشانہ سادھا ہے۔انا نے کہا ہے کہ پارٹی کے قول اور عمل میں تضاد ہے، جس کی وجہ سے شکست ہوئی۔آپ پر سے لوگوں کا بھروسہ اٹھ گیا ہے، سادگی کا وعدہ کرکے گاڑی، بنگلے لے لئے، ایم سی ڈی میں آپ کی شکست کا مجھے دکھ ہوا ہے۔ دراصل، کیجریوال انا تحریک کے ذریعے ہی ابھرے تھے، وہیں عام آدمی پارٹی کے لیڈر منیش سسودیا نے شکست کا ٹھکرا ای وی ایم پر پھوڑا ہے۔انہوں نے ٹوئٹ کرتے ہوئے الزام لگایاکہ بی جے پی نے 2009کا الیکشن ہارنے کے بعد پانچ سال تک ای وی ایم پر ریسرچ کر کے مہارت حاصل کی تھی اور آج اسی ریسرچ اور مہارت کے دم پر الیکشن جیت رہی ہے۔منیش سسودیا کے ٹوئٹ کے مطابق، ای وی ایم ٹمپرنگ ملک کی جمہوریت کی ایسی تلخ حقیقت ہے،جس کا شروع میں مذاق اڑ سکتا ہے، لیکن مذاق کے ڈر سے ہم سچ بولنا نہیں چھوڑ سکتے ہیں۔ادھر، عام آدمی پارٹی کے لیڈر گوپال رائے نے کہا ہے کہ یہ مودی لہر نہیں، بلکہ ای وی ایم لہر ہے۔آپ لیڈر آشوتوش نے بھی گوپال رائے کے ہی سر میں سر ملاتے پارٹی کی شکست کا ٹھیکرا ای وی ایم پر ہی پھوڑا ہے۔آپ سے ہی جڑے نگیند ر شرما نے بی جے پی پر طنز کستے ہوئے ٹوئٹ کیا کہ گزشتہ ایک دہائی سے دہلی کی گلیوں کی صفائی کئے بغیر ہی کامیابی حاصل کی، آخر ایسا ہو بھی کیوں نہ، جب مشین (ای وی ایم)آپ کے ساتھ ہو، تو آپ کی خواہش کا کوئی مطلب نہیں رہ جاتا۔حالانکہ اس دورا ن شکست کی وجوہات پر غوروخوض کرنے کے لیے آپ لیڈر وزیر اعلی اروند کیجریوال کی رہائش گا ہ پر جمع ہوئے ہیں۔